金融High Tea 2014年10月29日
袋咗先
2014年10月29日
滬港通壞消息插完一日，好似當無事咁，港股結算前彈番上嚟，不期然令人想起有人維穩的說法。呢排個市流傳一種講法，話有外資大戶造淡想撈大水，中央就全力撐住個市，實行唔畀大戶咁易得逞，實行政治上有政治上角力，經濟上有經濟上打仗，變成一場貨幣戰爭，至少頂到周四結算咁話。
個市係咪咁有戲劇性，陸羽仁只係信一兩成，但從淡友部署，9月初大市高位25362點，一嘢插落嚟，到本月初低位22565點，雖然唔算係股災，但調整最多近2800點計，基本上已抹去第三季升幅，如果要一條氣繼續向下再插，有一定的難度，要出現流血清場呢種事態至得。可幸聽聞阿爺最新部署係唔急於叫香港清場，佔半年都等得到，短期就不會有好災難性的事件。咁淡友停一停、唞一唞，喺結算前先食咗胡，一於袋住先，無論係實利抑或係策略上都係有着數，所以唔講有無中央維穩力量，個市喺咁低水平彈上嚟結算，係好正路做法。
克強效應再撐鐵路股
個市上彈另一個原因，係觀望外圍變化，因為美國買債計劃已完，聯儲局要就息口有所表示。按照原先走勢，主席耶倫應該開始就上調息口鋪路，但最近歐洲燃起通縮風，加上油價下插，有利美國延長低息時間，所以美國債息喺低位徘徊，美元喺10月中開始，表現無之前咁硬淨，反映市場對加息時間無睇得好似之前咁早。有咗呢個外圍因素，港股淡友有胡先食，都係明智之舉，畢竟真金白銀落咗袋，暖暖荷包，心理上都佔晒優勢啦！
借住內地股市急升，港股輕微高開後愈升愈有，受A股上升帶動，恒指最多爆升427點報23570點。午後上證綜指五連跌後勁彈逾2%，為三個月最大單日升幅，報2337點收市，市場憧憬國有企業改革。恒指全日最終升377點，報23520點，國指升237點，報10548點，主板成交677億元。百麗(1880) 業績佳，派中期息連同特別息共40仙，全日升9.9%，報9.32元，為全日表現最好藍籌。月尾咁夾法，但到下月可能又係另一個世界，如果揸咗重貨，可以諗諗係咪趁機減磅。
協鑫新能源亡命飛車
國務院總理李克強推介高鐵技術，刺激鐵路基建股大漲。喺克強效應下，中鐵建(1186) 升7.6%；中交建(1800) 漲2%，報5.75元。另外，市場消息指南車(1766) 及北車(6199) 停牌將公佈合併計劃。消息多多之餘，早上車的股民家真係進退自如，可揸可炒。
大市昨日以內地金融股表現最標青，無論內險抑或內銀，都係跑贏大市。呢浸追捧唔多唔少係憧憬中央放水，反正港股無乜概念好炒，要托高指數最好就搵大大件估值又平嘅內銀股。中行(3988) 上升2.79%，收報3.68元，內銀大笨象工行(1398) 弱小小，都升2%，收報5.05元；重農行(3618) 上升，中小行同民營銀行就只係微升，跑輸大市。內險股以中國太保(2601) 最出息，升近4%。
二三線股繼續炒味濃，協鑫新能源(451) 炒國策概念，近排不斷撩高。佢係月初曾經以2.55元配股，跟住就大幅撩高，不斷破頂。以昨日收市價計，又升8.33%，報收5.33元，已經比配售價高出一倍，呢架亡命飛車如果夠膽上車，家已經對本對利。睇番佢之前曾經有拆細等動作，一睇已經係個炒樣，但升到咁樣開晒巷，大戶大把水位走貨，短線隨時大上大落，好明顯係風險當炒股。
冷門股喺大股發力下，仍見熱鬧。可以一提係隻賽得利(1768) ，集團早前透露在內地業務獲得洽購，股價爆上，呢個星期又見佢異動。賽得利有意出售的黏短膠業務公眾唔係咁熟悉，呢類生產初期投入資金需求相當，若然賣盤成功，估計公司可以套現番一筆，股價當時已經炒上，昨日再爆上去創今年新高。不過炒呢啲股，記住借好消息兌現時食胡呀。
陸羽仁
金融High Tea 舊文