金融High Tea 2014年10月31日
炒政策
2014年10月31日
美國聯邦儲備局一如預期結束買債計劃，即係話唔再揼水入市場，但無講加息。消息公佈後美股反應平靜，港股就喺期指結算日略為回落。
10月港股先跌後升，臨尾幾日夾淡倉味道甚濃，先將淡友清場。彈完一大浸，踏入11月，睇吓個市會唔會有暗湧嘞！
退市完成添波動
話個市有暗湧，呢樣嘢唔係陸羽仁一個講，前聯邦儲備局主席格林斯潘都話美股有暗湧，佢話買債計劃結束雖然係預期之內，但市場少咗一股承托力，應該唔會風平浪靜。
格老係儲局任期最長的主席，主政期間有效控制通脹和增長間平衡，佢最拿手出口術調控市場預期，被視為最大威望的財金官員，可惜佢離任之後爆出金融海嘯，好多人都將責任歸咎佢在任時過份放鬆銀行監管，因為咁令佢有小小「臨尾香」嘅味道，影響力大幅下降。
雖然係咁，但係爛船都有三斤釘，格老係宏觀經濟分析的大行家，佢咁講點都有啲根據。陸羽仁認為，格老話市場有暗湧，對美國嚟講仲可能係一半半，對香港嚟講就真係要小心好嘅唔靈醜嘅靈，因為美國有聯儲局睇住，有乜失閃就會調整政策，但香港就唔同，美國用乜貨幣政策基本上係唔會理對我哋嘅影響，加上本港市底弱弱哋，當美國完成退市，開始討論加息時間表時，個市波動加劇變咗一啲都唔奇啦！
前晚美股無大變動，恒指輕微高開一陣就回落，最終險守23700點收市。恒生指數收報23702點，跌117點；國企指數收報10628點，跌95點，成交金額676億元。
藍籌股個別發展，最係受油價下跌影響嘅中海油(883) ，集團實現油價下跌，股價瀉4.46%，收12元，跑輸一眾藍籌股。擔心中海油受油價下跌影響削減資本開支，同系中海油田服務(2883) 跌幅是國企指數成份股最大，收報16.62元，瀉逾8%，公司收市後公佈首三季多賺22%。中石油(857) 上季少賺6%，股價跌近2%。
唔單止國企中招，加咗碼收購嘅新奧能源(2688) 都再度急跌，市場關注集團向主席收購錄得虧損的北美燃氣加氣站業務，股價再瀉5.89%，造46.35元。油價滑落，買咗嘢嘅國企能源巨頭固然損手，但佢哋係執行國策，點都頂得住，民企就唔同嘞，如果買咗件貴嘢，咁就隨時傷到入骨，甚至唔知好唔好得番。
能源價格受供應增加同需求不前影響，搞到相關股份變晒潺仔，相反近日大行對用油嘅航空股興趣增加咗，中金發表報告，認為東航(670) 第三季度利潤下跌，全年業績下降基本確定，但市場已充份反映上述因素。由於今年夏天日本及昆明航線連續兩年低位徘徊，明年有望在低基數推動下出現業績增長。考慮明年上海開幕迪士尼因素，樂觀估計有望帶來近10億元人民幣利潤，因此前景值得睇好，上調至「推薦」評級，目標價4元。
醫藥股炒政策炒上
鐵路股近日炒政策因素，廣深鐵路(525) 首三季純利跌34%，但A股昨早升停板，H股愈升愈有，新報3.36元，抽升7%。另外，國務院總理李克強昨主持國務院常務會議，部署加快健康醫療、企業監管等大數據應用，以及鼓勵養老健康家政消費，受市場憧憬政策出台，鳳凰醫療(1515) 被炒高，創上市高位，收報14.8元，勁升11.5%。加埋市傳電改新方案將在今年推出，電力股午後發威，個別板塊炒政策都炒得好高興吓。
陸羽仁
金融High Tea 舊文