陸羽仁 BLOG 2014年12月24日
2015美股預測
2014/12/24 09:11:15
網誌分類: 經濟
美股杜指收市創新高，終於突破18000點收市。紐約股市其實升得唔多，受良好經濟增長數據帶動，傳統藍籌股造好，杜指最多曾升逾百點，尾市升幅收窄，收市報18024點，升64點，升幅0.4%，再創收市新高。標普500指數收報2082點，升3點，同樣創收市新高。但反映科技股的納斯達克指數卻下跌，收報4765點，跌16點。
美國經濟增長數字強勁，美國商務部公布，經修訂後第3季國內生產總值(GDP)按季增長5%，遠高過上月公布的初值數字3.9%，亦高過市場預期，增幅是11年來最大。上季的經濟增長亦較第2季的4.6%增長加快，顯示消費及企業開支進一步加強。期內消費者開支終值上升3.2%，升幅是去年第4季以來最快；企業投資增長8.9%。
種種數字顯示美國經濟良好，聯儲局加息的機會上升，但股市無跌仲創新高，意味市場相信經濟企業會賺多啲錢，甚至接受到溫和加息。不過債市匯市商品市就有反應。
利息預期升債價跌，美國國債價格創1年多以來最大單日跌幅。市場關注聯儲局會否提早加息，美國兩年期國債價格下跌，孳息率升至0.735厘，創2011年4月後高位。10年期國債孳息率亦升至2.257厘，是去年11月以來最大單日升幅。
油價亦升，因為預期美國經濟好會增加原油需求。紐約1月期油收市報每桶57.12美元，升1.86美元，大幅反彈3.3%。美元上升，兌日圓曾升上120.82，創兩週新高。歐元兌美元跌至28個月低位，低見1.2164美元。
時近2015，開始有好多對明年的大預測，第一講美股，踏入牛市第6年，預計明年是美股波動向上的一年，係向上，但係波動式，唔係大升。一個向華爾街15個最勁策略師做的調查顯示，即使預期聯儲局加息、油價下跌和環球經濟疲弱，大多數策略師仍對明年美股樂觀。預測標普500指數的中位數是2216點，比昨日收市價2082點，升6.5%。
最低估計是高盛和巴克萊，只是估2100點，即是比昨日升1%都唔夠，最高是RBC 及Fundstrat估2325點，升11.6%。標普500指數今年至今升近13%，較2009年3月低位升207%。換言之係美股升咗咁多，明年又加息，比較多人估明年雖然會升，但升幅不及今年。唔太睇高美股明年升幅，也和其他預估有關。
第二個估計是油價續跌，俄羅斯有機會債務違約。俄國在1998年也曾債務違約，佢出口有66%同能源產品有關，要油價100美元才無財政赤字，現在的油價都好難捱，再跌更難捱。雖然俄國現在的儲備遠比98年多，但經濟結構太單一，頂唔住油價大跌的衝擊。雖然預計俄國債務違約不會影響到美國，但係金融市場都有啲波動。
第三是歐洲股市表現好過美股。估計歐元區雖然陷入長期而緩慢的增長，但歐洲核心國家、特別係德國，不會經濟衰退，歐元雖然跌咗好多，但明年繼續睇跌，所以有利出口，令經濟好番少少，所以歐股可能好過美股。
若然估計明年美股升幅唔多，今年底的上升已透支了明年部份升幅，見到美股升得較多時，小心佢會回吐。
(祝大家聖誕快樂，假期後見!)
陸羽仁
回應(15) 我想回應
陸羽仁 BLOG 舊文