金融High Tea 2014年12月1日
A股爆炒 順勢搵食
2014年12月01日
未來股市有兩個大趨勢值得關注，一個係油價急跌，一個是內地A股爆炒，順住個勢搵食，應有錢途。
先講油價，石油輸出國組織(OPEC)上周四在維也納開會後拒絕減產，維持每日3000萬桶產能目標不變，大大衝擊油價。紐約期油繼上周四大跌7%後，上周五再勁插10%，紐約1月期油收市報每桶66.15美元，急插7.5美元，創5年新低。由於俄羅斯也同意油組維持產量不變，令人相信是油組想推低油價，迫令美國的頁岩油公司破產。
美國近年的頁岩油業發展迅速，不止生產頁岩氣，還生產頁岩油，原油產量大大提升，據美國能源局數據顯示，上周美國油產量已升至每日908萬桶，逼近中東產油大國沙地的日均產量。
美企未死 油價未跌完
現時美國頁岩油每桶成本約為80美元，早前油價在90、100美元價位時，美國頁岩油生產商大力加大投資，都以當時的油價推算項目投資回報，尋求銀行融資，亦大量發債。若然油價急跌，這些在高位投資的油公司將會面臨債務違約風險。傳聞很多美國頁岩油公司做了90美元油價的對沖，但當這些對沖合約到期後，它們就會爆煲，現在甚至有估計指，油公司財困會觸發部份銀行的信用危機。
所以油組是在打價格戰，大力插低油價，逼到美國頁岩油公司破產，它們大規模重組之時，接管人一定會逼令它們將高成本的頁岩油停產，這樣就可以大大縮小美國頁岩油對中東等產油國的競爭。俄羅斯深受油價下跌之苦，但在OPEC的預備會議中，俄國代表聲言他們支持油組產油目標不變，即是話他們已採取一個「攬住死」的策略，想支持沙地，逼死美國的頁岩油商。俄國油公司甚至放話，話油價要到2016年才反彈，油價幾時彈唔知，但佢哋講到咁淡，好明顯想推冧油價。
若然這個分析正確，在見到美國頁岩油公司大面積出事之前，油價好難反彈，油組蝕本都會生產，迫死美國對手為止，油價在未來3個月至半年仍可能反覆下跌。
油價反彈 沽貨良機
油價急跌的宏觀影響是用油國、用油公司受惠，利好中國、日本產業經濟，利好美國消費。但亦會帶來通縮，對通縮較劇烈的地區如歐洲、日本不利。而黃金作為通脹的對沖工具，通縮就會沽金，金價跟住油價跌。
對股票而言，油價大跌對油股、氣股不利，對航空、製造等用油股有利。上周五石油股已捱沽，中海油(883) 跌5.5%，報11.34元；中石油(857) 跌3.3%，報8.41元，是當日跌幅最大兩藍籌。昆侖能源(135) 跌3.1%，收報8.39元。
頁岩氣股更急插，安東油田(3337) 跌6.5%；華油能源(1251) 跌9.5%；宏華集團(196) 跌9.6%。相反，航空股造好，國泰(293) 升5%；南航(1055) 升8.3%，東航(670) 升6.6%。因為上周五晚外圍油價再大插10%，港股未反映油價第二波大跌，預料今日油股和氣股會再插。
好多朋友見中海油、中石油跌咁多，心郁郁想撈，我就建議唔好撈住，因為美國頁岩油商未破產，油價未跌完，睇嚟油組要夾死佢哋才罷休，油價中線就算唔跌到35美元，都有機會跌到50美元。但油價短期跌得太急，或有反彈，若然一彈都會彈得好快，但反彈都只係沽石油相關股份的機會，唔係追入嘅時機。相反，航空股如國泰未來用油成本急降，生意有前途，但短期升得太急，可等油價反彈，或國泰回吐時，才入市吸納都未遲，高追可能要吃眼前虧。
成交大升 牛味隱現
另外內地股市牛氣隱現，上證綜指七連升，上周五收報2682點，升2%，直撲2700點關口，但對港股只刺激了H股，國企指數升131點，升幅1.2%，但同日恒指不升反跌16點，收報23987點，跌幅0.07%，主板成交902億元。恒指和國指背馳，皆因不少大股如匯控(005) 和長實(001) 當日已下跌0.6%至0.7%，拉低了恒指。
內地股市熱力四射，主要從A股成交升到癲晒可見，上周三、周四、周五，上海和深圳兩市合共成交金額，是以5000億元、6000億元、7000億元咁嘅幅度增加，上周五滬深兩市成交合共達7104億元人民幣，創了歷史紀錄，遠超過今年至今兩市平均每日2500億元成交的水平。
內地股市上周成交咁大，升幅亦多，以全星期計，上證綜指累漲7.9%，創逾4年來最大單周漲幅；深證成指累漲8%。總結全個11月，上證累升10.8%，深證則累升9.5%。
家最關心的是究竟A股係唔係進入牛市呢？在內地差不多眾口一詞話係牛市，老外就睇得淡好多，覺得內地產能過剩，經濟唔得，唔係幾覺得內地應該見牛市。
我估內地呢一浸升市，有好強官方影子在後面，內地經濟唔係幾得，國務院有好大意願頂住樓市，推高股市。滬港通、減息，都係呢個計劃一部份，雖然負責搞政治的官員想停滬港通勒一勒香港，但好快就畀負責搞經濟的國務院頂番轉頭，因為滬港通唔止對香港好，對推郁內地股市都有幫助。
內地股市不是純市場運作，還有官方影子在後，若然阿爺接連出招之餘，仲同各大基金頭頭講，你哋入市炒股啦，管理層都想股市高的，想經濟熱啲，往後還陸續有減息、減存款準預備金的招數出來。(以上是純屬靠估的對白)咁基金經理見到阿爺咁講，自然撲入市追貨，觸發股民跟風，才做出7104億人仔的單日高成交，呢個數即係9020億港元，港股900億成交已經算多，但內地成交係香港10倍，你話勁唔勁？
窮追有險 回吐增持
內地經濟並非一條坦途，要大力推高股市都唔易，但以H股近8倍市盈率計，只係美股的一半，話貴又真係唔貴，都唔係無開車炒作可能。可以審慎樂觀，升得太急唔追，回吐唔怕跟吓。
內地上證綜指上周五收報2682點，短期升得太急，A股最近造好，主要是靠金融股後上支持，其他股份已開始回調，往後調整壓力增加，但我建議大家亦唔好睇得太淡，3個月至半年內，上證綜指有機會上3000點，回調係吸納的機會。
我有朋友4、5月時聽我講，在8.1至8.2元買咗A50基金(2823) ，上周五10.3元放咗一部份，賺咗26%。另外佢又係聽我講，在13元多啲買咗萬科(2202) ，上周五又放咗啲，賺咗11%。我話沽一部份食吓胡無壞，但又唔使清倉，因為內房仍屬落後股份，回調一點後又可以炒落後升吓。未來兩三個月，紅色股似乎仲有上升空間，可以順勢炒炒。
陸羽仁
金融High Tea 舊文