一周三件：長短棍強攻中軟
■陳宇紅任主席的中軟國際，短打可博上回半年橫行頂三元。 資料圖片
中軟國際（354）喺咁多售軟件股裏面，講本身實力、大股東優勢，一啲都唔削，但股價表現似瞓咗覺，大橫行，一於長短棍應對。
中軟啱啱喺上個月公佈，已經成為電貿大哥大騰訊（700）遊戲最大IT服務供應商。又再早一個月，即係十一月尾，中軟亦都成功中標中移動（941）新一代電訊級服務嘅電子郵件業務「139郵箱」。
呢兩壇消息，都係反映緊一件事，就係中軟超強競爭力。再講，中軟大股東係聯想（992）阿媽聯想集團，一樣實力超班，但中軟家陣講緊得四十五億元市值，只係得聯想市值一千一百八十億元嘅3.8%，奀到爆。
行業需求大前景佳
又據IDC預測，祖國IT市場規模，去到二○二○年時，會高達六萬億元人仔。又去到明年，雲端服務同海量資料技術服務市場規模，亦會達到一千五百五十億元人仔。亦都睇到，中軟主打瓣數，有睇得見勁厚需求，加埋本身優勢，照計肥仔水。
中軟上年頭三季盈利增長43%，到1.54億元人仔，就快派上年度成績單，冇問題，而場內專業評估，集團今年度EPS0.22元，現價（2.42元）預測PE，跌到得11.0倍、1.55倍PB。
軟件行家金蝶（268）今年預測15.3倍PE、2.6倍PB、金山軟件（3888）13倍PE、3.6倍PB，又祖國嘅浪潮軟件，冇預測PE，而股價由上年五月起步，家陣翻咗一番，PB上到8.6倍。中軟呢八個月打橫行，比行家嘅PE、PB，亦係平咗大截，殘到冇譜。
買中軟，一轉短打，博上半年橫行頂三蚊，現價潛在回報率兩成半，一轉放長線，就當追上最貼近金蝶2.6倍PB，中軟係要見5.5元，現價係講緊要翻一番樓上。
錢雋
細價股專家
本欄逢周二、三、五刊出
錢雋
一周三件 - 錢雋 舊文