金融High Tea 2015年1月27日
又見水浸時候
2015年01月27日
世事如棋局局新，希臘選舉左翼贏出咗，令到佢脫歐風險大增，好多同歐洲做生意嘅朋友講，呢個結果走出嚟，對歐羅匯價肯定有壓力，而且同時影響埋美國利率政策。
歐洲上個星期大力開水喉，點知跟住又來希選舉，大家睇歐羅愈睇愈淡，部份極端小小的分析，仲估歐羅兌美元可能會去番一算，即係仲有一成幾幅度可以跌。
內地托住 港股唔肯跌
歐羅咁跌法，有政經猛人同陸羽仁估計，如果情況持續，可能美國佬都影響埋，因為歐洲匯價咁弱，對出口當然有利，令到美國巨企好似波音，同對手空中巴士競爭好蝕底。美國佬看在眼裏，可能都唔想美元升得咁快，成為另一個減慢加息腳步的理由。
美國喺歐洲放水後會點反應，要睇聯儲局覺唔覺得復甦步伐受影響，呢個星期美國會公佈多項經濟數據，其中國內生產總值錄得十一年來最高增長後，市場估計去年第四季增長放慢至3.1%。勞工市場方面，上星期首次申領失業救濟人數估計跌至30萬，料連續第二個星期下跌。另外仲有上月新住宅銷售、耐用品定單同密歇根大學消費者情緒指數。
由於銀根趨鬆，滬市又連續第五個交易日上升，尾段升勢仲轉急，收市升近1%，上證指數收報3383點，漲31點，逼近五年半新高。中證監副主席姜洋日前開腔指，正研究推出「深港通」。深成指受消息刺激，全日飆升逾2%。兩市成交6434億元人民幣。
受惠內地股市高收，港股反覆升近60點，重上24900收市。恒生指數收報24909點，升59點；國企指數收報12228點，跌31點，成交838億元。個股中騰訊(700) 最靚仔，瑞銀料微信朋友圈將助刺激收入，刺激股價創上市新高，高見137.1元，全日升3.24%，收造137元，成為港股升市功臣，向恒指貢獻咗73點升幅。
金山莫高追可低吸
有傳網絡安全審查辦法下月提交審議，科網股一枝獨秀。金山軟件(3888) 升6.5%，報18.74元；IGG(8002) 飆9%。金山軟件升得多難追，若然調整，回到17元可低吸，入咗定番一成止蝕。
內地網購活躍，加上反腐風，令內地好多商場都話生意難做。恒隆地產(101) 董事長陳啟宗喺業績記者會都承認，內地消費市道面對困難，未見何時才好轉，但佢就堅持內地整體經濟良好，唔使過份擔心。
朗尼陳話，內地去年第四季房價雖無明顯上升，但銷售追回首三季的落後。反而，高檔消費品市場的確受較大衝擊，但他相信現時市況只是短暫性調整，相信未來二十至三十年內地的消費市場仍是投資熱點，並向高檔市場方向發展。聽佢咁講，相信市場醒目錢暫時都唔會沾手主打零售物業的內房股住啦。
美國債息向下，資金追高息的房託股，多隻房託紛創新高。根據統計，2014年有15428個單位落成，屬八年新高，相比2013年8254個，按年大增87%，扭轉2007至2013年，過去七年平均每年落成量9665個偏低的局面。這些單位港島區佔2115伙，九龍區佔2836伙，新界區佔10477伙，分別按年上升3倍、1.8倍及56%，估計未來會持續增加。
住宅供應上升，但市場覺得未來資金仍會追逐資產，於是目標指向房地產信託基金(REITs)，多隻創52周新高。置富產業(778) 曾創一年高位，收報8.7元，升逾3%；同創高位的陽光房產(435) 仲靚，收報3.92元，飆逾5%。其他地產股好似新地(016) ；會德豐(020) 都升得唔錯。
陸羽仁
金融High Tea 舊文