異動空間：十蚊資產賣三蚊
執筆時路透消息指，中證監又出招遏股市，除咗打開口牌，短期內再查券商兩融（孖展、沽空）業務外，更「加辣」要內銀嚴控資金流入股市。中國人愛面子，阿爺更要飛士，話說「一一九」慘案後，A股孖展極速攀升，本周一創新高，明顯摑中證監一大巴。
上周魏力提過，阿爺絕非要打死個市，只係唔想泡沫谷得太快，搞旺股市都係想企業容易集資，助經濟渡過難關，但拎錢做生意賺錢易啲，定係抬入股市賭一鋪易發達？答案不言而喻。中證監救市底牌被睇穿，出辣招都係逼不得已，為股市降溫事在必行，相信A股短期易跌難升，至於會否出現「一二九」慘案？拭目以待，歡迎戰友上fb齊齊討論。
醜股繼續喪炒，賺錢快但中伏亦易，發掘超值股勝算更高。合豐集團（2320）去年賣廠房賺咗4.8億銀，但家陣市值僅3.35億元，當殼咁炒番上五億銀都有50%水位。公司每股NAV達1.59元，現價PB僅0.29倍，十蚊資產賣三蚊有找，太值博了。睇圖最近兩個月跌至0.43元均現強力支持，冒三個仙風險，博三成回報，中線睇六毫。
魏力
http://www.facebook.com/2012jason
魏力
異動空間 - 魏力 舊文