金融High Tea 2015年1月6日
要升唔使理由
2015年01月06日
內地復市牛氣凌厲，過年開市上證綜指升3.6%。未講個市住，先賣一賣廣告，呢輪內房股發威，大股好多炒上，隻萬科(2202) 仲率先創咗一年來新高，提起呢隻股，陸羽仁喺8月中在本欄介紹過，亦在頭條的視頻網媒(POPNEWS)分析過。
當時呢隻股做緊15元左右，建議策略係呢個水平入一注，每跌1元再入，共分三注，結果隻股真係跌過去12.84元後見底回升，到昨日創20.35元新高，平均拉勻三注升咗45%，都算有交代啦。
我昨日係POPNEWS有呢隻股最新分析，有興趣的讀者不妨去個APP睇吓。有中環茶友話，兜呢隻萬科兜得咁應，除咗食到內地股市牛氣，亦都因為萬科係內房股第一位龍頭公司，在內地好有名氣，公司有實力，但一般散戶唔識，所以話畀大家聽萬科係猛料，都有提示作用。
借意炒深港通
內地股市再向上衝，主要係總理李克強開腔，指深港通開車指日可待，令滬深兩市今年首日紅盤高收，老實講，滬港通開咗對交投都唔係咁活躍，照計深港通都唔叻得去邊啦，個市咁樣係借啲意炒一餐，證明要升其實唔使講理由。
恒生(011) 私人銀行及信託服務主管陸庭龍就話，A股自去年年底起飆升，主要受惠人行貨幣政策，相信今年上半年有機會再減息1至2次，而3月即將公佈的「十三•五」計劃，預期推出更多穩定經濟措施，以維持7%經濟增長，故年中股票市場升幅將會加快，第三季有機會升穿4000點。佢相信A股上升港股都會跟隨，只是升幅會遜A股。
睇好內地股市慢慢成為市場共識，相反，港股就仲係「車前褪後」。連升兩日後，雖然一度再升過141點，惟終難逃倒跌命運，最終恒生指數全日收報23721點，跌136點；國企指數收報12206點，跌38點，成交有1117億元。
內地升港股唔升都唔奇，港股上周五先升，消耗咗第一浸購買力，升完回吐吓好正常，但回深啲反而係入市機會。
由於內地A股尾市發力狂飆，上證指數更大升3.6%，A股ETF再被炒起，普遍都升番同大市差不多的幅度，安碩A50(2823) 又排係交投金額第一位。好多股民都話，原先以為滬港通啟動港股有得炒，點知原來A股ETF先係真命天子。
呢類同大市掛鈎的工具，一般上落都比較慢，點知呢幾個月佢哋升勢仲刺激過好多二、三線。
既然係炒深港通，相關概念股點都要郁郁！浙江世寶(1057) 炒高近28%，報8.54元；山東墨龍(568) 漲21%，報3.63元；新華製藥(719) 、東北電氣(042) 各自炒上12%。
藍籌方面，摩根士丹利調升港交所(388) 目標價，加埋深港通呢樣刺激，全日升了4.3元，接近2.5%，喺藍籌中算係叻仔。
輪到二三線內房追落後
中國指數研究院發佈數據顯示，2014年全國300個城市成交10.28億平方米，同比減少31%，相比2013年，去年土地出讓金僅有2.3萬億元人民幣，按年下降28%。除成交面積和金額下降外，土地市場交易低迷的另一個數據是溢價率下降。期內各類用地均呈下降趨勢，全年僅三個月份按年微增，低溢價成交成主流。但學陸羽仁話齋，市場相信內地要谷經濟，房地產唔可以衰，喺續憧憬樓市寬鬆政策陸續出台，內房股續炒落後，萬科、恒大(3333) 等都有表現，二、三線內房股追得亦好急，人和商業(1387) 炒高16%，造0.39元；雅居樂(3383) 、招商局置地(978) 升近9%，內房整個類別都可以留意。
陸羽仁
金融High Tea 舊文