魚樂無窮：半新股喪炒背後玄機
■上星期五掛牌嘅集成傘業由頭升到尾，埋單炒高56%。 資料圖片
上星期五掛牌嘅集成傘業（1027）平地一聲雷，由頭升到尾，埋單炒高56%。全配售嘅愛特麗皮革（8093）更癲，上市兩日，比配售價高出十倍，就算用第一日開市價計，都有近三倍升幅。打鐵趁熱，今日向半新股埋手，希望馬年攞番個尾彩。
第一炮上月底掛牌嘅時間由你（1327），唔係啩？隻嘢低過招股價三成喎，樓上大把蟹貨點炒先？望真啲，原來公司掛牌首日已經深潛，見埋上市低位，再睇分配結果，除咗A組尾分貨93%及94%外，其餘百分百中籤，難聽啲講真係一褲都係。試想想，用九成孖展認購分十足貨，一開波唔見三成，除非補孖展，否則就算自己唔掟都俾證券行斬倉。更重要係，公司第一日成交竟達2.6億股，相當於公開發售及國際配售嘅總和，幾可肯定老散嘅貨已沽得七七八八，夠膽喺呢個位接貨，絕非泛泛之輩，有理由相信貨源已歸邊。現價0.74元，只比當日平均成交價0.73元高一格，最新市值六億唔夠，用上市低位0.65元做止蝕，值博率夠曬。
第二隻推介今日掛牌嘅創板股惠陶集團（8238），公司喺香港從事出版、銷售及免費派發中文生活時尚雜誌，配售1.8億股，集資約三千萬，廿五大配售持股99.4%，名符其實乾到爆，如果幕後人士夠功架，要成為愛特麗皮革話咁易，用刀仔鋸大樹心態參與，未嘗不可。
唐牛
https://www.facebook.com/tongcow88
唐牛
魚樂無窮 - 唐牛 舊文