青心直說：近國策者有糊食
■在港上市而有中資背景的股份很多，找到接近國策的股份肯定有糊食，投資者不可不知。 資料圖片
大年初二車公誕，葉劉企錯位被麒麟「開年」；而家強局長今年唔去港交所（388）而去金銀貿易場主持開市儀式，結果唔到你唔信，恒指在笑得燦爛、八面玲瓏的周主席與惡補廣東話成功、但英文仍然較流利的小加總裁，再加上英華小學鼓隊各成員，位位精神奕奕，睇得又打得，成功壯港股行色，最終紅盤高開，其間雖有震盪，恒指仍幸保不失，攞足意頭，H指尾市跌幅亦大大收窄，在A股未開市、環球政經與藍籌業績放榜下，算有交代。
紅盤當然得來不易，惟更想知道家強局長有否後悔今年行差踏錯轉了場，因金市未能造好，事關賭仔都係姓賴。小加總裁口中的乜港通、物港通、一通百通，最終通唔通？還要時間來證明，但個市升唔升，反而是更多大小老嫩散戶們，最關注的問題。
社保基金優勢盡顯
早起的鳥兒有蟲吃？未必！其實好視乎附近有冇蟲蟲出沒，接近國策者卻肯定有糊食。此話何解？今時今日，近水樓台，得國策得天下，過半數本地上市股份，不理好醜，係由中資背景分子台前幕後揸莊，連唔識邊隻打邊隻嘅C9仔，都認得清楚誰是明刀明槍見錢開眼推散戶落火坑之輩。找個最接近國策的實體來睇頭，總好過盲從推介，否則，隨時被莊家大戶，過完一戙又一戙玩殘，都未知輸在哪。
今年西方情人節翌日，財政部網站公佈了掌管老百姓養命錢（即係唔輸得）的社保基金二○一四年度的基金投資收益情況，截至十二月底，社保基金會管理的基金資產規模總額已達一萬五千二百九十億元（人民幣．下同）；全國社保基金權益一萬二千三百五十億元，基金權益投資收益一千三百九十二億元，投資收益率11.43%，超過同期通脹率9.43%。社保基金會二○○○年成立，至去年底的累計投資收益額五千五百八十億元，年均投資收益率為8.36%，優於同期年均約2.42%通脹率近六個百分點。
社保基金新開戶與出入市手影，已成為A股走勢領先指標，尤其去年第三季佈局被市場唾棄多時的大藍籌與基建股，反映被稱為國家隊的社保基金果然沒有辜負本身的背景優勢，成功撈底。
胡孟青
獨立股評人
胡孟青
青心直說 - 胡孟青 舊文