中環在線：港交所「神壇」曝光
周松崗李小加匿埋切燒豬
■交易廣場地下呢個機房平時門常關，估唔到入面供奉咗關二哥。周松崗（右）同李小加噚日仲喺入面切燒豬。 夏家朗攝
噚日係羊年第一個交易日，港交所（388）主席周松崗與行政總裁李小加按照慣例出席開市儀式，仲向在場嘅出市代表同傳媒大派利是。但原來佢兩位喺開市儀式後，有一個更加重要嘅任務，就係去港交所嘅秘密「神壇」拜神，幫交易所同香港股市祈福。
1986年沿用至今
港交所呢個「神壇」，地點神秘得嚟其實又好公開，位置就喺正中環交易廣場，即係交易大堂下面嘅巴士站旁邊。由於門口只係得一對鋼門，冇其他指示牌，望落同普通士多房冇乜分別，所以就算平日好多人行過，都唔知道呢度內有乾坤。
呢個「神壇」實際上係交易所嘅機房，早喺一九八六年四會合併之後、交易大堂搬到現址就存在，裏面安有關帝像。
聞說最早期只係交易所嘅技術人員，為咗祈求工作順利，所以喺呢度拜神，後來到咗九十年代，交易所有些少事情唔順利，有人就建議不如每年開市都喺度拜神祈福，前交易所主席利漢釗、李業廣、夏佳理等人，都曾經同埋當時嘅行政總裁一齊喺呢度祈福。
噚日周松崗同李小加出席完開市儀式，就即刻落咗去呢個「神壇」拜神。燒豬同生果當然唔少得，更重要嘅係，佢哋兩位都好神心咁向裏面嘅關二哥上香，唔知係祈求滬港通嘅交投可以越來越活躍，還是深港通可以盡快開通呢？
可能真係拜得神多自有神庇佑，噚日恒指開市冇耐一度向下跌過百點，但最後收市都拗腰微升四點，勉強令羊年首個交易日收紅盤。
李華華
mailto:LiWaWa@AppleDaily.com
李華華
LiWaWa@AppleDaily.com
中環在線 - 李華華 舊文