金手指：希臘講就凶狠？
■希臘一月選出的新政府，能否解決經濟危機仍是未知之數。 資料圖片
羊年到！孫柏文祝大家得心應手！重貨嘅朋友蒸蒸日上，全現金或買重熊證嘅fans新年快樂，火燎森就當然一如既往一本萬利啦！新正頭雖然香港冇市，不過周圍都繼續如常營業。
洩密軟件並非漏洞
先講聯想（992），佢哋被揭發裝咗啲會令你部電腦俾人睇曬嘅軟件，名叫superfish，本報即時新聞叫呢單嘢做「嚴重安全漏洞」，呢個形容詞我係唔同意，原因漏洞呢個詞語，應該係用來形容例如你買部車著咗火。但當部車嘅設計師，係特登記錄兼傳送你部車去過、點去啲地方嘅資料時，呢個就唔係漏洞。大家都知聯想，特別係佢哋啲手提電腦係好受企業客戶歡迎。相信負責嘅職員可能為保烏紗，已經喺過咗嘅周末喺公司出memo，話以後都唔再用聯想，咁聯想之後嘅盈利又會點？我睇唔透，難搞。
再講希臘。早兩個禮拜，我曾經話過希臘喺一月選出嘅新政府，總理、財長等思維同信念，有如香港經過幾輪選舉後，先選建制，再選主流民主派，跟住選嚇選嚇選咗雨傘運動班骨幹組政府一樣，同北方派來想褫奪希臘自主權嘅人反枱。點知，呢個由希臘版雨傘分子組成嘅政府，始終都係鍾意使錢，所以冇錢唔得，又唔敢玩大佢，唔敢幫自己境內啲借咗好多錢畀希臘政府嘅銀行計數要存戶輸錢，所以聽聞將會接受北方柏林畀佢哋個「繼續拖字訣、喪權辱國」方案。啱啱過咗嘅周末，我同個喺劍橋讀經濟科嘅大學生傾起希臘呢單嘢，連佢都話：「希臘係一定還唔到錢喎。」
雖然我落筆呢刻真係唔知究竟希臘新政府係咪淆底，但如果真係，我諗最失望嘅就會係選佢哋嘅希臘國民。
禮拜三就係財政預算案，唔知他朝啲本土卒執政時，特首帶白框眼鏡，會唔會都因鍾意使錢所以要聽北大人指揮。到時候唔通要學今天希臘人慨嘆：「講就凶狠，做就……」
孫柏文
獨立股評人
http://facebook.com/shuen
本欄逢周二刊出
孫柏文
金手指 - 孫柏文 舊文