陸羽仁 BLOG 2015年2月24日
石油增產
2015/02/24 09:09:01
網誌分類: 經濟
匯控業績唔好，外圍股價大跌，在英國收市跌4.6%，今日港股先要受此一擊，不過按過去經驗，多數一開市就造咗個低位，之後會彈番少少。
外圍美股三大指數昨日漲跌不一。杜指微跌24點，收報18117點；標普500指數跌不足1點，收報2110點；納指則連漲第9日，微升5點至4961點，離2000年3月科網股爆煲前歷史高位只差1.7%。
納指昨日逆市造好，全賴蘋果公司推動。蘋果公布去年第四季度賣出了7400萬部iPhone，盈利180億美元。昨日又表示蘋果股價今年至今上漲了18%，將投資17億歐元(約19億美元)在歐洲建立兩個數據中心，它們將完全由可以用再生能源為動力，這兩家位於愛爾蘭和丹麥的數據中心將支持全歐洲客戶的蘋果線上服務，包括iTunes Store, App Store, iMessage, Maps和Siri。
蘋果上周才傳出將會生產電動汽車，令市場為之一振，昨日又有宣布有數據中心的新搞作，股價就愈升愈有，昨日漲2.7%至132.99美元，再創上史新高。單係今年，蘋果股價累積漲幅達到18%。市值突破7500億美元，係標普500成分股排第二的艾森克美孚的兩倍多，認真驚人。iPhone6受歡迎的利好因素還在不斷發酵。
美股昨日明顯缺乏方向，投資者都在等待同觀望，等待的事情又的確唔少。首先係希臘政府能否在周一午夜前提交關於削減預算與進行經濟改革的方案予歐盟領導，以換取延期還款的批准。最新消息係希臘政府要將限期推遲到周二朝早。其次係聯儲局主席耶倫今明兩日到美國國會出席聽證會，投資者都希望從耶倫的證詞中，搵到聯儲局會否於今個夏天開始加息的線索。
加拿大道明證券的美國經濟研究主管埃里克 (Eric Green) 在其報告中表示，耶倫是次上到國會作證，可能會令市場失望。市場目前普遍預計聯儲局可能會推遲到2015年較晚時候至開始加息，甚至有可能唔加，到明年至算。這種觀點主要係受到了上周三公佈1月份聯儲局貨幣政策會議紀要的影響。紀要稱，「許多與會者都認為，在對相關風險進行評估權衡之後，他們傾向於在更長時間裏把聯邦基金利率保持在較低水平。」但1月份會議以來的形勢發展，尤其係強勁的1月份美國非農就業數據，可能已令某些聯儲高官的觀點發生了改變。
第三個令市場觀望的因素係油價問答。昨日，尼日利亞石油部長Diezani接受《金融時報》專訪時話，「油價如果再向下跌，他將會在未來6個星期內召開石油輸出國組織(OPEC) 的特別峰會議。」不過，有OPEC代表表示，該組織沒有計劃在油價下跌期間召開任何的緊急會議。
現時OPEC輸出全球大約四成的石油。據彭博社資料，OPEC 1月份每日產油3009萬桶，已經係連續8個月超標生產，唔係減產。而美國能源資訊部則預計，美國產油量會增加至每日930萬桶，係自1972年以來最多的。大約10日前，美國原油儲備上升至4.25億桶，亦係1982年最高。全球經濟放慢，在石油需求減少的同時，產油量卻不斷向上，油價又點會唔跌呢？
任由油價下跌，似乎已經係OPEC及美國的共識，如果OPEC開緊急會議，會俾人一個可能會做嘢去支持油價的印象。但以OPEC對油價下跌就手旁觀嘅態度，根本唔會有緊急會議呢回事，市場似乎是在白等。油價昨日又再回軟，紐約原油跌番落去每桶50美元樓下。
我都係估油價未跌完，可能要見3字，但內地放出石油巨企重組的消息，會不會是油企自己放料去支持股價呢? 無論如何，在重組的憧憬下，即使油價再插，大陸油企可能無預計跌咁多。
陸羽仁
回應(2) 我想回應
陸羽仁 BLOG 舊文