金融High Tea 2015年2月24日
羊年大趨勢
2015年02月24日
羊生性喜歡跳上跳落，不易捕捉，羊年股市都係一樣，過往羊年股市都係難玩居多。今個羊年，散戶見外圍唔錯，加上希臘債務危機繼續拖，紅盤高開後，點知個市開盤滑落，又陰散戶一鑊，好彩重磅股騰訊(700) 乘住納指挑戰新高炒上，頂住指數輕微升咗幾點，叫做完成紅盤高開高收嘅使命。
羊年首個交易日表現反覆，美股杜指上周五飆154點，帶動港股高開84點報24916點；惟24900水平上即見沽壓湧現，恒指迅速倒跌，低見24664點，挫168點。不過，大市低位見買盤承接，港股收復大部份失地，恒生指數收市升4點，成交只有500餘億元。
藍籌股個別發展。微信紅包戰大勝，騰訊勁升3.8%，造134.8元，為表現最叻藍籌，為恒指貢獻83點升幅；港鐵(066) 創52周新高，一度高見36元，收報35.95元，升逾3%，港鐵呢排手風似乎轉順，喺內地又投咗個項目，不過佢一向都係慢車前進，忽然升咁多，好似就急咗啲。花旗發表報告，認為內地油企合併機會不大，因違反「國企改革」目標，三桶油全線回吐。
匯控大班要減薪
匯控(005) 收市後公佈去年稅前盈利跌17%，差過市場預期的跌7%，由於全年表現遠遜預期，加上備受避稅醜聞纏身，業績報告顯示，集團行政總裁歐智華2014年整體酬金減少5.2%，至約9067萬港元，好似減得唔夠多喎，都少過盈利跌幅。睇?家咁形勢，大班寶座都係熱氣位，唔易坐得穩。
匯控管理層都承認，業績未如理想，罰款及和解開支等都拖低盈利，並增加營業支出。今年會面對更多壓力測試等挑戰，可能要再出售業務。
匯控全日收報72元，升0.05元或0.07%。業績公佈後，佢在倫敦表現更差，一度跌超過5%，真係無眼睇，陸羽仁一直提大家唔好去撈匯控，睇嚟都無錯。
羊年個首日紅盤小到出人意表。本來，股市唔係升就跌，否則就係牛皮，雖然只有三條路行，但往往九成以上嘅人都估錯，呢個就係投資奇妙的地方。好似內地股市，去年升到「嘭嘭聲」，之前都無人估到，內地專家形容佢係「逆襲之路」，即係出其不意的市。
去年7月前，內地股市仲喺二千點關口打緊艱苦的攻防戰，但踏入第三季開始好，到第四季瘋牛來襲，若然不是中央大力淋冷水，A股升幅肯定勁過?家好多。從羊年首個交易日，港股唔理外圍好消息，紅盤未有大升，顯示中國因素始終係主宰大市氣氛的主要因素。
汰弱留強嚴防黑心股
究竟內地股市羊年會點？有專家做咗五個發展趨勢，用來捕捉內地投資目標，呢五個趨勢包括內地經濟結構調整和完善金融市場；自由貿易區的推廣發展；農業現代化；房地產和改善民生，以及「一帶一路」與國際戰略。
專家認為，跟從呢五個大趨勢，投資者可以考慮相關股票，好似優質證券商股如中信證券、港口股、內銀股、基建鐵路股等。呢啲股種部份只係在A股掛牌，投資者簡單啲可以候低買入內地指數關連的ETF，也可以考慮一些在港掛牌，有相同概念的股票。
內地進入換檔期，中央要頂住增長，維持社會穩定，需要不斷有搞作，無論係完善金融市場，以至大搞一帶一路，總之都係唔可以停下來。
除咗留意呢幾個大趨勢，專家仲提醒，今年內地會有大量公司上市，結果係加強咗優勝劣敗，好股劣股表現更加明顯，故此投資者要特別小心，避開黑心股票，唔好做一味跟風嘅羊咩咩，咁就可以順手牽羊，喺波動市況下繼續做個有錢賺的開心股民！
陸羽仁
金融High Tea 舊文