魚樂無窮：景福再傾賣殼冇難度
■景福屬老牌珠寶首飾店，但業績已大不如前。 資料圖片
考車失敗例子多不勝數，但屢敗屢試總有一日成功。無他，學咗咁多個鐘、花咗咁多心機，無理由白白浪費。嚇？你又想推介港通（032）？非也！雖然西隧剛剛加價，絕對值得再講，但驚大家悶嘛，一句講曬︰繼續揸實等財息兼收好了。
無理由白費心機
講考車例子，其實係想帶出今日嘅推介——景福（280）。唔好以為無關係，景福剛宣佈賣盤失敗，正正等同考車肥佬，一定會捲土重來。點解咁肯定？咁就要從公司鋪路賣盤說起。
景福屬老牌珠寶首飾店，但業績已大不如前，完全被同業如周大福（1929）、六福（590）等比下去，最新全年業績更轉盈為虧，蝕足1.3億。既然本業不濟，賣盤成為最佳出路，公司前年宣佈二供一供股，成功收乾貨源，再結束證券業務，一步一步將架構簡化。公司舊年六月表示控股股東與數位潛在投資者洽售股權，帶動股價炒高一倍過外。可惜經過討價還價後，今年初宣佈終止洽商。老老實實，作為一個生意人，為賣殼做咗咁多嘢，用上以年計時間，試問又點會咁易番轉頭呢。而家殼股有價有市，遲啲賣價錢只會更吸引；股價急回後，最新市值只得五億元，較NAV折讓四成，說穿了又係筍價，趁低吸納等埋枱再傾，值博率極高！
唐牛
https://www.facebook.com/tongcow88
唐牛
魚樂無窮 - 唐牛 舊文