中環在線：唐家成、歐達禮
開會咬手指舒壓？
■唐家成（圖左）同歐達禮不約而同開緊會咬手指，又會咁蹺嘅！ 李潤芳攝
好多人不自覺有啲小動作，好似撥弄頭髮、玩手指、印腳、轉筆等等，根據行為心理學，呢啲小動作反映到當事人某種心態。證監會主席唐家成與行政總裁歐達禮噚日一齊去立法會開會，期間兩人不約而同狀似咬手指，唔知佢哋有冇察覺自己有呢個小動作呢？
行為學家：感覺孤獨
臨床身心及行為學家李寶能分析指，小朋友戒掉奶嘴之後，好自然會發現啜手指可以舒緩情緒不安，成年人唔會啜手指，即使係潛意識想做呢個動作，就會將手指放喺嘴邊，或者演變成玩手指，如抿手指皮或指甲。呢啲動作都係反映當事人自信不足、感覺孤獨、期待有人支持、千頭萬緒但係有口難言。
噚日立法會召開財經事務委員會會議，證監會要就二○一五/一六年度嘅財政預算面對議員質詢，呢個會大約開咗一粒鐘，期間有七、八名議員積極提問，每人起碼問兩條問題，換言之，唐家成與歐達禮要應付接近廿條問題，如果有啲問題喺預期之外，都真係好容易產生些少不安。
唔通唐家成與歐達禮噚日面對多名議員質詢，期間有啲真係唔識點答，或者越答就越覺得孤掌難鳴，又或者係講極，班議員都係唔多明？
議員都確係幾關注證監會預算每年有四億元虧損，指情況唔多健康，特別係證監𠵱家租用超人李嘉誠嘅中環長江中心（租約至二○一七年），每年有龐大租金開支。唐家成與歐達禮要諗諗計了。
【又瞓覺又挖鼻窿】 立法會議員黃定光（右）繼早前喺立法會開會時啪啪啪剪指甲，噚日開會時又瞓覺又挖鼻窿，或者佢發夢諗住挖鼻窿，醒咗就即刻行動喇，佢似乎已經將議事堂當做屋企，唔記得此乃莊嚴嘅地方。金融服務界議員張華峰（左）坐喺佢旁邊，似係受到感染昏昏欲睡咁款。 黃耀興攝
【溫柔咬耳仔】 立法會工業界代表林大輝（右）議員跟邊位女議員咬耳仔，咬到咁高興呢？大輝議員笑成咁，對方應該喺度展示佢溫柔嘅一面嘞。 黃耀興攝
李華華
mailto:LiWaWa@AppleDaily.com
李華華
LiWaWa@AppleDaily.com
中環在線 - 李華華 舊文