魚樂無窮：英皇證券又屆起動時
■樓價升不停，金管局總裁陳德霖話會密切留意情況，唔排除會採取逆周期措施。 資料圖片
樓價升不停，金管局總裁陳德霖話會密切留意情況，唔排除會採取逆周期措施。拜託，今時今日樓市全面扭曲，都係政府亂落藥所賜。一個人流落荒島冇嘢食，惟有摘野果充飢。冇野果？咪食樹皮囉！一步一步退而求其次，同今日上車客用幾球買劏房沒有兩樣。
新鴻基公司（086）停牌，彭博指光大證券擬收購新鴻基旗下證券及財富管理業務。老老實實，A股成交日日幾千億，港股只得其尾數，加上傭金鬥平鬥賤，土炮證券行絕對唔易做，賣盤予大陸同業肯定係未來大趨勢。噚日消息一出，土炮證券行應聲炒上，從業務、估值及圖表出發，英皇證券（717）高幾班。
英皇證券業務涵蓋貸款、經紀、配售及包銷和企業融資，可謂包羅萬有，行業最吃香嘅一號牌（證券交易）及九號牌（資產管理）更盡攬一身，值錢指數達十粒星。去年盈利2.2億銀，按年增長42%，市盈率9.7倍，係唯一市盈率單位數嘅證券股，估值平通街。近期同業如海通國際（665）、國泰君安（1788）均發盈喜，英皇證券今年業績點計都唔會差，意味估值只會更平。賣點多成咁，大陸同業肯定𥄫到實。公司舊年底一度炒高至1.32元，其後以三角形走勢整固，噚日一棍大陽燭呈突破，食指大動也！同上次推介一樣，不設目標價，希望升浪打孖上！
唐牛
https://www.facebook.com/tongcow88
唐牛
魚樂無窮 - 唐牛 舊文