金融High Tea 2015年2月3日
民行鬥法
2015年02月03日
民生銀行(1988) 行長毛曉峰，疑涉捲入令計劃案，又話佢幫高官搞夫人俱樂部，俾啲夫人掛個名不用返工白支人工。毛曉峰被扣押失咗自由，民行日前急急宣佈佢以個人原因辭職。安邦保險近日不斷增持，已取代民行創辦股東劉永好，成為民行大股東，安邦保險家話無意出售民行。
峰迴路轉嘅係民行另一主要股東之一、今日巨人網絡董事長史玉柱在微博上表示，考慮到業務能力、文化認同、與團隊融合、與董事會溝通的風險，如果領導委派一個陌生人空降到民行當行長，他在股東大會上將會投反對票。
史玉柱仲話，個別領導曾向民生銀行委派一無能力行長，導致銀行發展停頓，耽誤幾年。史玉柱一番話，使人關注到民行未來動向。市場有不同的陰謀論流傳，包括過去有人已經睇中民行，想借機鯨吞該公司，史玉柱出招，頗有鬥法味道。
長和逆市勢強
民生銀行早前高位係10.7元，昨日就收9.16元，驟眼睇差唔多跌咗一成半，喺內銀股大部份唔跌得多的情況下，佢嘅調整幅度相當明顯，不過，細睇該股昨日一開市最低插過落8.46元，跌成10%，之後已大幅反彈，收市只跌3.1%，內地A股走勢差唔多，都係跌3.1%，市場猜度一直有增持的安邦係唔係仲買緊。
內地消息話，對民生銀行開刀，只是金融反腐第一波，聽到股民腳仔軟。我就話反腐的確會嚇一嚇，但又唔等於公司會執笠，唔止阿爺怕金融波動會睇住嚟玩，仲有好多人會去搶控制權，所以打到嚟也不是無底直跌。
內地數據顯示製造業處於收縮水平，加上憂慮內銀捲入反腐風暴及新股發行速度加快影響。滬市低開近2%，上證指數尾市愈跌愈多，一度急挫2.7%，上證指數收報3128點，跌82點，以近全日低位收市。跌跌吓又跌近1•19黑色星期一後第二日造的3100點低位，要睇吓守唔守得住啦。
墨西哥無限期擱置當地高鐵項目，累及鐵路基建股捱沽，中國鐵建A股(601186)急挫9.91%，接近跌停板水平。北車(6199) H股都挫4%，報9.56元；南車(1766) 跌幅相若。
美股上周五大跌251點，加上內地股市沽壓大，諗唔到港股今次算硬淨，港股低開後跌勢加劇，點知午後跌幅顯著收窄，加上騰訊(700) 發力，最終恒指僅跌逾廿點收市。恒生指數收報24484點，跌22點；國企指數收報11578點，跌141點，成交852億元。最叻係長和孖寶，長實(001) 隨時就衝破152元的一年高價，可以話強勢畢呈。
科技股再炒過
不過論強股都係數科技板塊，騰訊升2.9%，金山軟件(3888) 升0.6%，佢哋上星期五跟阿里巴巴跌，昨日就反彈，科技股有少少轉強趨勢。
阿里巴巴主席馬雲來港亮相，公眾最關心的不是業務發展或者仲有無其他上市計劃，而係集團和中國國家工商總局的「口水戰」，工商總局話「淘寶正品率不足四成」，觸發阿里巴巴大反擊。有消息話呢場風波或暫告一段落。國家工商總局發言人上周五正式表態，稱早前網監司發佈對阿里巴巴行政指導的「白皮書」文件「不具有法律效力」，市場估計局方咁嘅反應，係咪有人發咗功呢？
雖然風波在內地好似暫告一段落之勢，但口水戰再度令外界關注阿里的法律風險。內地政局風起雲湧，民企全部變成「風險投資」，工商總局突然對阿里有所動作，自然令人聯想是不是出了甚麼狀況。家內地好似講掂數，但美國班投資者唔係人咁品，若佢哋話要發動集體訴訟，阿里巴巴都有排煩。你可能問我都無買阿里巴巴關我乜事？我就話阿里巴巴等在美國上市的中國科技股唔得，會唔會令資金回頭到香港炒吓科技大股？
陸羽仁
金融High Tea 舊文