一周三件：中渝置地超抵
■中渝置地去年上半年盈利飆升六倍，前景看俏。 互聯網
阿爺喺上周六忽然再減息四分之一厘，keep住放水嘅步伐，內房喺嚟緊嘅日子，應該有運行。而場內中渝置地（1224）嘅股價喺八年間跌咗九成，仲想佢點插，唔使諗，梗係博中渝向上彈！
中渝主打重慶、成都等西部地區內房業，坐擁過八千萬平方呎嘅土儲。呢啲地區，正正係西部開發，同一帶一路重要戰略發展地點。啱啱喺上年尾，重慶市政府副秘書長張智奎，就篤定重慶要喺二○二○年，成為長江經濟帶西部中心樞紐。
減息加速內房回暖
又隨住阿爺持續減息放水，加速內房回暖，加埋上邊呢啲重中之重嘅經濟國策，中渝土儲又勁厚底，喺嚟緊嘅日子，有運行。係咁意計嚇數，以土儲每平方呎增值/獲利一百蚊咁大把，已經為中渝帶嚟過八十億元增值，係家陣市值35.5億元嘅兩倍！又唔計任何增值，中渝家陣PB得0.24倍，連埋上邊咁係咁意增值計數，NAV上到九蚊樓上，PB係講緊得0.15倍，陰功！
中渝上年上半年盈利一支箭飆升咗六倍，去到8.1億元，兼超過曬二○一三年度五億元盈利。中渝就快派二○一四年全年成績單，已經有得博盈喜。又當集團全年盈利，只係keep喺呢個半年度水位，現價（1.39元）預測PE，講緊得4.4倍。
好嘢仲未講完，中渝去到上年中，未確認嘅收入，就高達一百六十一億元，隨住個別項目交付，一入賬的話，可以再帶動全年，締造更靚仔成績，中渝PE，隨時仲低！再講，中渝去到上年中，揸現金八十五億元，淨借款比率得16%，唔似得個別內房股，債浸眼眉，中渝財政穩陣到爆燈。
呢轉買中渝，博盈喜，博阿爺放水政策刺激，當翻四分之一番到1.75元計，PB都仲係得0.3倍。
錢雋
細價股專家
本欄逢周二、三、五刊出
錢雋
一周三件 - 錢雋 舊文