笑到最後：
下一隻未炒靚殼
大家都知道，本欄喺大升之前清倉，錯過咗復活節前後嘅一個急速升市。渡完假返嚟，本欄正式開工，為呢個牛市，又做過啲乜呢？以下係一個簡單回顧。
上兩星期：本欄建議用下策先買盈富基金（2800），因為「恒指有冷門滙控（005）未升，仲有得博」。結果，上星期五，市傳
滙豐會遷冊，收市前半個鐘，收報73.8元，升4.2%，推高恒指過百點。
上星期：本欄重申一注獨贏買京維（1195），最早喺4月初叫人0.485元上車，上星期一再叫人買，結果上星期五下午升第二棍，再升超過兩成見0.74元，繼續睇目標價一蚊。
高明拎番兩篇舊文出嚟認威，只係想證明畀錯過咗大升市第一段嘅人睇，即使錯失先機，但係股市個個禮拜都會開。只要肯入番場，都會有機會贏番。更何況，而家唔單止係大牛市，更係大家都未見過咁大規模嘅資金市，復活節嗰幾日升幅，極可能只係頭盤，未入場人士值得搵位再入番，準備享受大市重上三萬點嘅主菜。
入正題，上星期炒得最癲嘅股唔係港交所（388），而係一眾細價股，仙股只得番廿幾隻，已經好接近2007年大牛市時得番15隻嘅高潮位。殼股亦都係被掃對象，對上一年，有人話「淨係個殼都四、五億」，本欄相信，資產負債表靚嘅殼股，十億以下會絕跡。
佳華資產負債表乾淨
佳華百貨（602）上星期報0.59元，市值6.12億元。舊年7月高明已推介過，當時股價0.38元，已經話呢隻係神級靚殼，現金3.22億元，物業投資加廠房值3.36億元，扣番債同應付賬，淨資產都3.89億元，淨係資產值已經每股0.37元。同上次寫嘅時候比，資產下跌，或反映咗行業經營困難，但對於殼股就係一個好消息。
佳華自2007年上市以來，未向股東伸過手，反而持續派息，除咗2009年環境差唔派之外，年年都有派，而家股息率達4.24厘，現兜兜派息，無疑係乾淨股。
上星期四同業歲寶（312）都抽升15%，現市值13億元，我即刻諗：歲寶陷入過民企風波，佢咁都升得，即係市場求細價股若渴；佳華得6億幾，一路都咁乾淨，值得尊重，炒上10億幾絕對唔過份，相當於股價0.96元；大市幾時上三萬點冇人知，但肯定資金會一路湧入，細價股冇可能唔順勢炒一轉。佳華係市面上絕少十億以下未炒、乾淨嘅靚殼之一，資金湧到，脫離毫子股上蚊唔難，照舊先睇一蚊。
高明
https://www.facebook.com/bigricetea
本欄逢周一刊出
高明
笑到最後 - 高明 舊文