陸羽仁 BLOG 2015年4月27日
放新股吸水
2015/04/27 09:23:17
網誌分類: 經濟
又一個周末平安渡過，因為周末是阿爺出招高危期，各方原來怕中國證監會利用假期出招為股市降溫，結果無料到。
對上一個星期五中國證監會在收市後見記者時，提到要監管股市融資(孖展借貸)，又話要增加融券(借貨沽空)的渠道，搞到股民
好驚，怕佢上周末再出招。
上周四晚間在內地己流傳，「為抑制股市泡沫，多部門擬提高印花税、恢復資本利得税」。此消息喚起老股民對於2007年因為加印花稅出現「530暴跌」的慘痛回憶，市場人心惶惶。不過中國證監會上周五早上已發佈微信稱，該傳言為虛假資訊，希望投資者要仔細辨析資訊來源，不要誤傳誤報。
依家最熱議的問題係上證綜指的4444點，究竟係短期頂位抑或牛市頂位呢？
有內地分析指出，據過往經驗，阿爺對股市泡沫的調控，主要分兩個階段，第一個階段係「齋講」或者「齋做」，或者兩種手段輪流用，呢個階段係用警告方式，誘導市場降溫。例如透過央視（CCTV）批評A股泡沫，但無相應打壓政策出台，又例如國稅總局宣佈雙向提高印花稅稅率，但阿爺卻否認此舉係為了打壓股市。
不過，如果阿爺發現誘導無效，股市降唔到溫，甚至有大大起泡跡象，認為唔可以再容忍，就會進入強迫降溫階段，即第二個階段：「又講又做」啦，例如幾年2007年A股狂升至 6124點，阿爺公開表示對藍籌股過度投機炒作不能容忍，同時指令公募賣股及暫停公募基金的發行。大市就開始持續7年嘅大熊市，A股一度跌到1100點！
目前市場仍只處於「齋講」或「齋做」的階段，管理層今年已經6次提示股市有風險，也聲言出招規管孖展借貸及鼓勵借貨沽空，IPO新股發行速度從每月一批10隻到30隻，到現在每月兩批50多隻。我覺得即使中國證監會要出招降溫，都不用出到加印花稅咁重手，因為真係可能一加稅就大插，亦也不是阿爺想見到的事，加快批新股上市集下資係王道做法，即可增加股票供應降吓溫，又可以利用股市作為集資支持經濟的渠道。若然內地股市再喪升，當然會出強一點的降溫招數，但離「又講又做」的大降溫尚遠。
美國方面，上周五公佈的3月耐用品訂單較上月大幅增長4%，遠好過市場預期的增長0.6%，而扣除飛機非國防資本耐用品訂單則較上收縮0.5%，低過預期的增長0.3%，不過，仍好過上月的收縮2.2%，另外，微軟及亞馬遜等科技巨頭業績差過去季，但卻好過預期，股價分別大漲10%及14%，令科技板塊得到支撐，頂住大市。杜指漲21點，收報18080點；標普500指數升5點，收報2118點；納指收市漲36點至5092點。總結全個星期，杜指漲1.4%、標普指數漲1.8%，納指最勁，大升3.3%。
美股近排的升勢，主要由美企業績帶動。呢個結果令唔少分析家跌曬眼鏡，他們原先估計在美元強，油價弱的衝擊下，美企第一季表現慘淡，令到牛咗6年的美股會出現比較似樣的回調。據統計，分析師估計只有44%的美企業績會好過預期，而營收預期較去年同期平均下跌3.3%，盈利則下降1.5%。
結果又係點呢？據湯森路透資料顯示，169家已公佈了財報的企業，其中71%的成績表都好過預期，亦成為推動大市向上的主要動力。不過，有分析指出，這些亮眼成績，其實並非由銷售增長帶動，而是來自股票回購、削減開支及其他措施所致。湯森路透則認為，美企業績驚嚇場面還在後頭，大多數的能源企業仍未派成績表，在油價大跌的衝擊下，估計盈利會較去年同期大跌64%！
陸羽仁
回應(4) 我想回應
陸羽仁 BLOG 舊文