魚樂無窮：新意網剛起步有排炒
■新意網今年累計升一成，遠遠落後於軟件股及手遊股。 資料圖片
港股終企穩25000點，但市場焦點明顯落在香港創業板身上，事關中保監宣佈，容許保險資金南下買創業板股，刺激創板指數升半成，六年最勁。數據顯示，截至2月底內地險資餘額達9.6萬億人仔，係創業板總市值嘅65倍，名符其實蚊髀同牛髀，北水係咁意買少少都不得了。
創業板中流抵柱新意網（8008），亦趁勢炒高5%，但今年累計只升一成，遠遠落後於軟件股及手遊股，不合理！今鋪借內地保險資金南下，價值有望重新釋放。
睇好北水搶入新意網三個原因。第一，概念足。內地「互聯網+」概念大行其道，新意網乃本港數據中心龍頭，出租率keep住八成，最新將軍澳數據中心將於2017年營運，大數據、雲計算個餅越做越大，新意網飲硬頭淡湯。
第二，估值平。盈利連續五年雙位數增長，市盈率只得18倍，比起軟件及手遊股動輒三四十倍，起碼平一半，仲要有逾四厘息打底，有升有息，啱曬險資口味。第三，夠名氣。新意網乃新地（016）旗下，郭氏家族相信喺內地無人不識，肯定吸引資金眼球，正如漢能（566）係首富李河君揸旗，所以日日登上港股通成交榜。
講到咁正，呢一浪睇幾多先？睇番早兩日推介嘅暢捷通（1588），如入無人之境，就知一旦有大戶搶貨，講目標價係多餘的。
唐牛
https://www.facebook.com/tongcow88
唐牛
魚樂無窮 - 唐牛 舊文