中環在線：嶽少禦廚開完澳門店要唞唞
進駐銀河 月底開幕
■Bombana間唔中都會親自下廚。 朱家駿攝
旅發局主席林建嶽（嶽少）出名識飲識食，亦係幾間高級食肆嘅老闆，華華噚日去佢位於中環置地廣場嘅CIAK-In The Kitchen食晏，巧遇主理呢間餐廳嘅米芝蓮三星名廚Umbert
o Bombana，佢話最近忙緊喺澳門開81/2 Otto e Mezzo Bombana，準備得八八九九；開埋呢間，佢暫時未有大計。
■澳門銀河二期將於月底開業。 無懼賭業寒冬累生意
Bombana舊年初應承呂志和，喺佢旗下澳門銀河綜合度假城第二期開分店，新餐廳跟新賭場將於本月底同步開業。Bombana透露，新餐廳嘅裝修佈置已經差唔多，工作團隊亦安排妥當，都係跟佢工作多年嘅同事。
不過，近期澳門賭業吹淡風，少咗豪客去賭錢，連帶高級食肆嘅生意亦可能受到影響，Bombana就話唔係咁擔心。佢認為，澳門發展得越來越似美國拉斯維加斯，唔係只得賭場，仲有好多娛樂設施，佢都曾經帶10歲女兒過大海睇show，大呼過癮，所以佢唔擔心高級食肆嘅生意前景。
咁都啱嘅，學佢話齋，佢開過咁多間餐廳，有乜大場面未見過呢？佢一定處理到各類嘅經營壓力。對佢嚟講，最重要係提供到優質食物，佢好堅定咁話，即使香港租金高昂，但佢一定唔會喺食物方面妥協，所用嘅食材一定最好，單係CIAK，食材就佔總成本約60%，相當落本，即使唔係賺好多，毛利率只屬單位數，佢依然樂在其中。
李華華
mailto:LiWaWa@AppleDaily.com
李華華
LiWaWa@AppleDaily.com
中環在線 - 李華華 舊文