滙海探戈：慎防希臘攬炒
聯儲局上周派糖，會後聲明不但冇提9月加唔加息，更調低未來兩年息口預測，主席耶倫雖重申今年加息意向，但講明家陣未有條件去馬，成為美股強心針，美元則續受打壓。
歐元期權金折讓飆
美滙指數上周再跌0.9%，收報94.08一個月低位，輾轉已連跌三周，加上過去兩周收市僅
一天站穩五日線，形勢偏弱，礙於加息仍只聞樓梯響，短期或下試5月中低位的93.13。美元兌G10貨幣上周近乎全軍盡墨，只有前周爆冷減息的紐元逆市再跌1%。英國工資數據及英倫銀行指經濟改善，造就英鎊上周彈1.2%成升幅王。歐元上周雖跟大隊漲0.7%報1.1351美元，但期權市場顯示，歐元認購相對認沽的期權金折讓是今年最大，意味投資者對歐元後市有戒心。
希臘深爆煲憂慮日增，歐盟領袖講明本周領袖峯會係希臘回頭是岸嘅最後機會，聽聞希臘今日會提交新的改革建議，但相信只屬原有方案嘅小修小補，在削減養老金及削減電費補貼等稅務優惠仍難讓步，債權人好難收貨。令人擔心是希臘總理齊普拉斯擺出你不讓步大家攬炒嘅戰鬥格。市場好擔心月底援助方案結束後，希臘只能靠歐洲央行緊急借貸解困，問題係當地人恐慌情緒升溫，上周已從銀行提走50億歐元存款，歐央行見勢色唔對路亦可能閂水喉，令希臘銀行業出現擠提，最後要實施資金管制應對，為脫歐揭開序幕，造成金融震盪。
奇兵
本欄逢周一刊出
奇兵
滙海探戈 - 奇兵 舊文