金融High Tea 2015年6月26日

金融High Tea 2015年6月26日
試底考驗入市膽汁
2015年06月26日
　　美股老牛雖然衝上高位，但力度就唔係咁得，升兩升就要唞一唞，希臘債務談判有阻滯，杜指低收，港股四連升但成交未見配合，在水頭唔夠下，遇上內地跌市，升勢終於斷纜。港股傳統「六絕」，但若講難搵食，「五窮」係最惡啃日子，過咗呢兩個月，個市表現多數都會有改善。

　　港股7月份應該有好消息，其一係中港基金互認。另外，深港通在9月份有可能開通，都成為潛在利好消息。

　　內地股市再度試底
　　雖然有好消息醞釀，但陸羽仁認為如果想買貨，都要戒急用忍，最好等好似昨日那種跌市低吸，好過高追。照牌面估，淡友今個月唔會隨便認輸，多數會喺結算前壓住個市，所以想入貨就可以等佢跌時出手；再者，今個星期升市成交減，顯示唔係咁多新資金入咗市，所以有錢想買貨，宜以分注睇咗先入。在6月底前個市仲有回調壓力，跌市入貨要考驗大家的膽汁。

　　昨日內地取消銀行貸存比率75%限制，近月底水緊人民銀行昨早又進行350億元人民幣逆回購放水操作，是逾兩個月以來首次重啟，兩者都係好消息。

　　人行官方微博表示，近期受半年結金融監管指標考核及股份發行等因素影響，部份中小金融機構的短期資金需求增加，及時開展公開市場逆回購操作，適量投放短期流動性，有助穩定市場預期，促進貨幣市場平穩運行。

　　不過，內地股市仍係處於災後創傷期，無咁快可以回復牛氣，雖然兩大利好消息，但人行主管在報章發文稱本月已無降息和降準可能，令投資者失望，搞到內地股市借啲意調整，全日先高後低，上證指數午後曾大跌4.4%，低見4483點，尾市跌幅收窄，險守4500關，上證指數收報4527點，瀉3.46%，深成指數收報15692點，插3.8%，創業板指數更重創超過5%收市，兩市逾百股跌停板。上證綜指上次回落低位係4256點，要先睇睇呢次回馬槍呢個位守唔守得住。由於午後內地股市大瀉，恒生指數收造27145點，跌259點；國企指數收報13467點，跌216點，成交1185億元。

　　股市活躍，大量內地富豪想來香港買殼，淨乾殼淨殼價5億都唔易有貨，所以掀起一個殼股尋寶潮。理文手袋(1488) 自宣佈大股東獲洽售股權，股份連日狂飆，幾日間抽升近倍。未宣佈洽售前佢市值不過六億幾元，派息有兩厘零，加上個殼乾淨，買來博大霧可以話進可攻、退可守。但依家佢已經急升咗，昨日成交過億，炒味好濃，若然洽購無結果，股價打回原形就幾傷吓。

　　零售股唔殘唔買
　　今年零售市道麻麻，零售股公佈業績輸少當贏。莎莎國際(178) 公佈截至今年3月底止全年業績，盈利8.39億元，按年跌10.3%，每股盈利29.5仙，派末期息9仙及特別股息5.5仙，由於派息不俗，股價在宣佈後企穩。

　　莎莎少賺一成，喺咁市道下已算叻仔，佢股價由高位接近9元反覆回落到4.18元，息口去到有5.6厘，已逐漸反映壞消息。

　　有做過零售業人士話，市道回軟後租金會慢慢回落，認為莎莎呢類優質兼派息不俗的股票，可以低位收集，等候回升。陸羽仁就保守啲，覺得買盈利倒退的股票等如摸底，要爛茶渣價錢先至吸引，莎莎現價可能係合理，但未算係好抵，尤其如果係好市之中，呢類股票會升得慢，所以就算想買來收息長揸，最好等佢再抵啲先，又或者只係買少少當作交住入場費先。我的策略係唔殘唔買。

　　另一隻賣錶的寶光實業(084) 今年3月底止全年業績，純利9176萬元，按年跌46.6%；每股盈利8.77仙，派末期息1仙。由於股價先前跌咗唔少，公佈後股價同樣企穩。

　　陸羽仁
金融High Tea 舊文