金融High Tea 2015年6月5日
Chok爆
2015年06月05日
上證綜指昨日逼近5000大關，走勢Chok到唔恨，上午差50幾點到5000點，午後股市一度大跌，上證指數一度瀉5.4%，低見4647點，搞到港股跟插，但之後內地股市又V形反彈轉跌為升，港股跌幅跟住大大收窄，真係心血少啲都爆咗血管啦。
A股早上跌得咁甘，其中一個源頭係創業板急挫。由於內地證券商發出公告，話鑑於近期股市波動，創業板股票漲幅大，市盈率過高，決定對兩融(即係孖展和借貨沽空)業務中有關創業板股票全部調出融資融券範圍；調整創業板股票的可充抵保證金折算率，咁等如即時閂細咗創業板的水喉，搞到相關股票紛紛掉頭向下，拖累埋主板。
A股插低後去到4600點有番啲支持，仲拗腰彈番上去；創業板指數跳水時曾重創7.2%，後來出現戲劇性出現「V」彈，收市只跌1%，上證指數收市回升，報4947點，升37點，升幅0.8%。
累升太多 唔易爆上
點講都好，內地個市累積升幅咁大，連續兩次調整喺5000點前回頭，但好快回升番，嚴格嚟講調整唔夠。
從阿爺角度，可能都覺得隻牛走得快過頭，所以最近唔見有乜新政策推出，正路講個市最好都係唞夠至好，方便阿爺再出招，唔易大幅爆上。
港股跟A股坐過山車，恒生指數收造27551點，跌105點，微跌0.4%；國企指數收報14127點，升12點，成交增至1952億元。
除咗內地股市好唔穩定，都要留意吓歐美國債債息急升的情況蔓延至亞洲市場，亞洲多個國家的國債息升至近期高位。澳洲10年期國債息連續第三日急升，一度突破3厘水平，升至三周高位，日本、紐西蘭等國家的國債亦被拋售，債價下跌，債息上升逾3個點子。
歐洲央行行長德拉吉表示，投資者須適應近期市場的波動性，言論進一步刺激歐洲多國債息急升，德國10年期國債孳息率高見0.89厘，是去年10月底以來最高水平，從債息抽上，顯示全球資金喺度執緊位。
中廣核比亞迪借力A股
市況勁Chok，但暫時無影響集資功能。在內地上市的中國核電今日公佈中籤率結果，網上中籤率1.6319%，網上網下凍結資金合計1.69萬億元人民幣，創A股IPO單隻新股申購凍結資金量逾七年新高。
佢一隻股凍資金額超過同期上市其他10間公司凍結資金總額1.59萬億元。
中國核電今次發行價格每股3.39元人仔，集資131.9億元。由於招股反應理想，帶動香港掛牌的中廣核(1816) 挑戰高位。中國核電中籤率唔算高，下一浸睇佢掛牌會唔會再炒多轉。
內地新股受捧，比亞迪(1211) 計劃發A股，集資150億人民幣，用於動力鋰離子電池擴產、新能源汽車研發及補充流動資金及償還銀行借款。該股復牌後抽升，最高造62.3元，收報59.3元，升4.8元，幅度是國企指數成份股最勁。
對於比亞迪發行A股集資，德意志銀行發表研究報告，認為對現有股東的影響是中性至偏向正面。
考慮到政府支持新能源車，維持H股「持有」評級，目標價為51.1元，同時俾A股「沽售」評級，目標價40.9元。不過，呢啲又係外資之見，同大媽股民睇法未必一致。
呢個星期股仔炒風無之前咁勁，不過隻中國置業(736) 獲南車(1766) 附屬公司CSR入股，午後復牌後狂升，一度飆3.23倍，高見3.64元，收造3.33元，爆升2.47元或2.87倍，升幅是港股最勁，南車就重組未完繼續停牌。
陸羽仁
金融High Tea 舊文