實戰理論：悶市下的最佳策略
■市況反覆又淡靜，在如此環境分段吸納才是最佳策略。 資料圖片
市況仍然反覆，期指倉底又沒有加倉，成交淡靜，後市方向未見，惟有等。圖表派睇熊市，又見死亡交叉，佢哋認為「港股無理由唔大跌」，起碼睇21000。
外資行話中國暴力幹預市場，日日搬龍門，要離場唔玩，
佢哋覺得A股冇得玩。好在周一筆者以「港股無理由會大跌」為題，令到股市「大跌225點」！但與筆者希望出現的入市低位，仍差一大截。你知啦，全條街咁淡，唔夠低就真係唔敢買咁多，相信大部份仍有力買貨的小投資者，心理上一定會有壓力。所以，在此情況下，分段吸納才是最佳的策略。
炒輪風險視乎注碼
筆者上周買了一小注港交所（388）窩輪，策略上就等如落part，若大市不回吐，起碼有一注低價貨底。若大市真的插一下，便可以低位溝一注，將平均成本拉低。有人問，點解在此等市況夠膽買窩輪，風險這麼高？其實，水能載舟，亦能覆舟，風險高低在於注碼。若相信未來大市會行單邊，無論大升定大跌，買正股1,000股，需要20多萬，但買窩輪則只需萬餘元，買中的話贏的銀碼相若；若看錯市，輸盡就是此銀碼，但正股若不止蝕，就會輸更多。
點解要買港交所？正如股榮話齋，此股跟大市的相關性頗高。不過，若從因果關係計，應該是大市為因，港交所為果，不應因港交所走勢差而看淡後市，反而應該從大市的升跌方向，來預測港交所走勢。篇幅所限，明天才揀幾隻刀仔鋸大樹的港交所輪給大家。
沈振盈
證監會持牌人士
沈振盈
實戰理論 - 沈振盈 舊文