金融High Tea 2015年8月6日

金融High Tea 2015年8月6日
主席鬥大行
2015年08月06日
　　港股擺脫內地跌市回升，不過成交再跌，睇嚟大市仲係未有明顯方向，投資者大部份觀望，睇唔通寧願少落注。

　　大家無嘢好買，搞到政府嘅iBond爆晒飛，一人未必分到兩手。橋唔怕舊，最緊要受，iBond咁爆飛，相信連高官自己都諗唔到。

　　投資者大歎無嘢買
　　iBond咁受歡迎，好明顯係市民避險心態濃烈，有閒錢無嘢買，股票自七月事變後，快上快落咁得人驚，嚇窒唔少投資者，依家個市後向未明，股民寧願保守啲。

　　唔止股票係咁，睇番外匯同黃金，呢啲普通人鍾情嘅投資，在美元強勢下，呢排表現都係難玩。金價再度尋底，呢排油價下跌，加拿大元兌港元跌穿咗六算，好耐都無試過咁低，其他貨幣都係升少跌多。

　　市民投資咁難，搞到有少少雞肋味的iBond都爭崩頭。中環茶友話，依家機管局想起第三條跑道，又唔想向立法會伸手，咁不如研究吓發債向市民集資啦，好過淨係靠同銀行借同徵費啦。如果政府肯擔保，又或者用番機場收入嚟擔保，機管局發行債券利息就算平過向銀行借，都有好多市民願意認購，實行自己機場自己起、自己債券自己買，最好係債券面額拆細啲，仲安排埋喺交易所掛牌，等公眾有個賺息嘅機會，相信可令支持興建三跑的聲音增加番。

　　市民唔敢亂買嘢，股市變成易上易落。早段內地股市抽升，推動港股升幅擴大至176點，高見24582點，但內地股市跳水倒插，波及港股升幅明顯收窄，尾市在買盤推動下，最終升過百點，恒生指數收造24514點，升108點；國企指數收報11125點，升50點，成交縮至686億元，創逾五個月新低。匯控(005) 及中移動(941) 為升市火車頭。

　　個市咁靜，港交所(388) 自然無力，收跌0.48%，報206.6元，個市成交咁奀，佢仲企喺200元樓上已算好叻喇。利豐(494) 被摩根大通降低目標價，收造5.71元，挫2.73%，為包尾藍籌股。

　　利豐被插股價挫
　　隨着網絡發展及物流發展，利豐作為中間人的定位備受挑戰，幾年間股價由15元樓上跌到昨日的5.71元，差不多失去七成市值。由於股價持續下滑，以去年盈利計市盈率只有14倍，息率超過7厘，數字相當吸引，近排利豐(494) 榮譽主席兼非執行董事馮國經連番增持，推動股價升番上7元樓上。不過，摩根大通早兩日就發表報告，認為受到歐羅疲弱影響，加上產品售價弱，削減利豐純利預測一成，同時將目標價由7.5元降至6.5元，維持「中性」評級不變，變成主席鬥大行，股價又再下插。

　　利豐曾經係基金愛股，由於高增長獲得高估值，股價不斷攀升，令公司市值過千億元。但隨着全球商業模式改變，利豐高增長不再，去年純利更倒跌近四成，公司決定加派特別息穩定股東信心，可惜未能挽留大行信心，繼續有大行調低目標價。好似利豐呢類基金股，升跌要睇大行點評價，由於佢係盈利推動的股份，業績不進反退係估計大忌。過去佢大升時如果無賺過佢錢，?家又有無必要去撈底呢？

　　體育股有少少番生，安踏(2020) 半年多賺兩成，首席執行官丁世忠透露，存貨問題已完全解決，是歷來最好時刻。即使目前生意好轉，在存貨控制方面會較保守。受好消息刺激，早上創上市新高後倒跌，曾高見21.2元，收報19.34元，挫3%，係好消息出貨。由於現價唔平，相信要消化一下先有機會再闖關。

　　陸羽仁
金融High Tea 舊文