中環在線：銀行分析員紛離任
梁兆基太太上岸
■銀行業風光不再，安彤善和余明麗（梁兆基太太）相繼離開銀行界分析工作。
銀行業風光不再，銀行分析員自然亦冇乜好推介，今年中起身嘅前巴克萊舵手Antony Jenkins就對路透社預言，未來10年銀行業仲要裁減半數員工與分支機構㖭！難怪華
華熟識嘅兩位資深銀行研究部主管，都先後退休或提早上岸，唔再喺呢潭死水打轉。
69歲安彤善返美國老家
其一係下月中正式榮休嘅瑞穗證券亞洲銀行研究部執行董事安彤善（James Antos），佢將飛返美國老家安享晚年，佢笑說已經69歲，「唔想再做到好似奴隸咁款，拒絕再工作嘞，要展開人生新一頁」。
James係傳媒之友兼好好先生，訪問好少托手踭，又勤力出報告，批評大行唔會隱晦，有碗話碗。
另一位「姐」級銀行分析員－德銀亞太區金融機構研究部主管兼董事余明麗（Tracy），原來上月中亦悄悄引退，德銀班同事仲替伊人搞咗個farewell drink送別。
Tracy之前做過花旗、瑞銀，資歷深厚，但佢仲好年輕。佢話呢次係全退，以後專注家庭與教會服務，佢話職業生涯能夠見證四大行來港上市與內地金融改革，已經好難得，算完成任務，係時候退下交棒。睇嚟佢老公大人──滙豐銀行亞太區顧問梁兆基，以後大把住家飯食兼靚湯飲嘞！
回想昔日銀行分析員粒粒皆星，好似殿堂級人馬──高盛前亞洲合夥人羅慕斯（Roy Ramos），同瑞銀研究部阿頭Keith Irving等，有姿勢有實際。Roy嘅代表作係90年代末，帶咗班基金大客，拜會滙控（005）前大班龐約翰，之後出報告唱好當時仲未紅底嘅滙控，料半年內見百五蚊，大笨象之後好似火箭咁升穿曬目標價！不過此一時彼一時了。
李華華
mailto:LiWaWa@AppleDaily.com
李華華
LiWaWa@AppleDaily.com
中環在線 - 李華華 舊文