金融High Tea 2015年11月26日
千金小姐
2015年11月26日
市場熱話之一係電能實業(006) 私有化不成功，呢個千億「大刁」觸礁，主要因為公司手頭持有大量現金，小股東覺得合併作價不夠吸引。交易受挫，相關股份短期自然受壓。長建(1038) 收報68.8元，微跌0.36%；電能成為包尾藍籌，收造70.55元，挫2.9%；長和(001)
也跌0.39%，報103.6元
一早都估到，即使電能小股東覺得換股價低，小超人都唔會不斷加價，所以好易散㗎。電能手頭大把錢，小股東期望派息，能否如願仲未知。未來電能業務主要睇佢點樣善用手頭子彈，同埋海外業務表現。至於香港業務，就真係唔係咁樂觀。因為現時政府做緊諮詢，未來准許利潤回報調低在所難免，關鍵只係幅度而已。
本地電力有減價壓力
財經及庫務局局長陳家強昨日喺立法會表示，政府在2008年度推出電費補貼計劃，之後三次「加碼」，向250萬個兩電住宅用戶，每戶合共發放了9000元，計劃到明年6月底期滿。四輪電費補貼計劃合共涉及223億元核准承擔額，至2015年10月底，承擔額尚餘超過8.4億元。
家強局長重申，電費補貼是一次性的紓緩措施，並非恒常計劃，必須設有限期。
由2008年推出以來，已多次延長使用限期，補貼不是現金津貼，當局會繼續聆聽社會的意見，不宜無了期延長計劃。?家政府累積補貼二百幾億電費，若然停止補貼，市民電費的支出負擔肯定大增，要求削減回報的政治壓力都幾難頂。
現時本地電力公司准許回報有百分之九點九，自計劃生效後，全球通脹和資產回報率大跌。
同時，本地增長進入高原期，扣除通脹實際經濟增長只有百分之三、四，未來可能更低，市民加薪幅度都唔好得幾多，明顯比准許回報率為低，喺複利效應下，電費佔生活支出同營商成本的比重有增無減，只不過因為有補貼，減輕了公眾的痛苦指數。
不過，好多人同企業都呻電費貴，環境局局長黃錦星講到明要減回報率，但減幾多好大機會係下屆政府去決定，呢個亦係好敏感的政治議題。
本地電力業務喺今時今日投資回報偏低下，係一塊大肥豬肉，但呢塊肥肉食咗咁耐，係咪可以食落去已有好大疑問，所以電能好醒目咁趁好價將呢瓣業務分拆成信託基金上市，實行套現。?家坐擁巨資，本來呢個千金小姐，長建想迎娶佢入門，點知禮金講唔掂數，千金小姐又變成待嫁姑娘，可能又要寂寞一輪。
天能炒作「新三板」概念
至於港股微跌幾十點，算係有驚無險。俄羅斯戰機遭土耳其擊落，中東局勢火上加油，好彩午後內地股市發力，帶挈港股收復部份失地，恒生指數收報22498點，跌89點。
A股午後題材股大漲，證券、銀行止跌回升，帶動滬指上行，創業板全天表現強勢，刷新反彈高點，午後一度衝上2900點。市場?家焦點仲係創新概念股。
除了內地創業板，天能動力(819) 宣佈有意分拆屬下業務上新三板，股價連日大漲，昨日再創一年高位，收報7.17元，升了3.3%。
天能動力表示正考慮將旗下天能能源在內地新三板上市，早幾個月已經推薦該股的中金認為，天能能源主要從事研發及銷售鋰動力電池產品業務及鎳氫產品業務。該行相信，分拆短期內對天能動力盈利影響有限，因鋰電池業務佔2015上半年收入的3%。
該行認為，鋰電池業務在新三板的估值很可能比天能目前估值更高，維持「推薦」評級，目標價7元。佢連目標價都升破埋，如果有貨可以食住一半胡先，博喺低位撈番。
陸羽仁
金融High Tea 舊文