金融High Tea 2015年11月19日
躁底有玄機
2015年11月19日
港股CHOK上CHOK落幾日，好淡雙方未有出大力，大市陷入悶局。不過，不同板塊繼續執位，部份弱勢股份再下試低位，喺資金有限下，投資者只可以玩換馬遊戲。
時間飛逝，話咁快滬港通開車一周年，港交所(388) 高層被記者問起兩地股市聯通效果好似未符預期，行政總裁李小加有啲
黑面，答話咁係因為先前雷聲太大啫。其實，李小加都好難怪記者咁贈興，因為睇番呢個星期港股交投都係奀奀豬，滬股通仲連續多日出現淨沽出，有小小愈玩愈縮的感覺。如果大市交投持續係咁，港交所股價都有壓力。
港交所都對息口敏感
滬港通出台初期平平淡淡，無諗到喺第二季突然爆上，惹起無限憧憬，特別係港交所股價高處未算高。陸羽仁有個買股當儲蓄的書友仔，最近無事不登三寶殿，專誠打來問點睇港交所股價，因為佢一直儲入港交所，喺280元仲入貨，所以手頭股份雖然有早年買落的平股，但平均價差唔多要200元樓上，依家企係十字路口，唔知仲好唔好入貨。
好多人鍾意買港交所，皆因鍾情佢概念獨特，只此一家並無分店，而且賺到盈利大部份可以用來分派，可以收息。本來，呢個分析無咩錯，只係任何概念都係有個價。好似港交所係一間好公司、一隻好股，但究竟應該值幾多錢呢？講到底，任何事物都有個價，所以陸羽仁唔係太贊成一味睇好某個概念，一味話有買貴無買錯之類的分析。
美息有向上趨勢
以港交所為例，雖然佢有1.9厘息，但係佢差不多將全部盈利派出街，基本上派息增長要靠日後盈利帶動，以佢依家市盈率46倍計，完完全全是一隻增長股的估值，如果短期內佢盈利唔可以有強大增長，咁佢仲值唔值咁高市盈率呢？
睇番業績，港交所生意透明度好高，主要睇住港股成交、新股上市數目同英國LME商交所營運數據。咁多瓣生意中，港股生意叫做唔錯，不過喺利息上調之下，無論新股同交投都好難寄望大增長，至於LME主力營運的金屬商品交易，衝擊可能仲大啲。如果睇真，佢都係一隻利率敏感股，當息口向上，人人覺得現金是王，減少投資時，港交所唔會執笠，但盈利都會受衝擊，未必係好似部份分析家咁講到係金身不壞。
呢次港交所由高位插下來，差不多插了三成，高位追貨都幾傷。若然從市盈率睇，佢現價唔係太平，唔排除個市會跌的話，佢會再試試200元支持，加上管理層咁躁底，反映業務氣氛可能唔係幾順，所以我叫書友仔都係唔好咁急買貨住啦。
麗展供股不如賣殼？
大市昨日成交縮至637億元，有點乾跌味道，恒指收造22188點，跌75點；國指收報10055點，跌18點。澳門行政長官崔世安預計明年澳博彩收入僅2000億元澳門元，比市場預期低，而且無乜特別消息幫助博彩業，濠賭股普遍下跌。金沙(1928) 跌3.4%，報27.05元；銀河娛樂(027) 降4.6%，報23.75元，跑輸一眾藍籌股。我一早講阿爺唔想澳門博彩業咁發達，澳門政府要做係多元化產業，既然北京有呢個意志，澳門政府點會唱反調，所以炒澳門施政報告有好消息，只係一廂情願啫。
麗新發展(488) 公佈，建議以二供一比例供股，發行100.47億股，供股價0.092元，較公佈前收市價折讓33.33%。控股股東麗新國際(191) 包銷。今次集資淨額9.12億元，擬撥作一般營運資金，麗展股價即時碌低。有中環茶友笑言，搞到一供二咁大陣仗都係收9億元，賣殼都執到6億以上啦，使乜要搞咁多嘢喎。
陸羽仁
金融High Tea 舊文