中環在線：媽打自爆投資曾蝕入肉
金融海嘯期間 幾乎血本無歸
■「媽打」李麗娟買入滙控，撞正金融海嘯坐艇。
聖誕新年殺到埋身，年尾又多人擺酒，大家通常發現唔夠錢使，先知道預先理財嘅重要。咁啱投資者教育中心近日搵來11位大使拍短片，叫大家要有金融理財知識。其中，人稱「媽打」嘅前民政事
務局常任秘書長李麗娟就自爆金融海嘯時「差啲血本無歸」！
各位大使拍嘅推廣短片大約2至3分鐘，比較特別係媽打，佢冇講2008年金融海嘯時蝕幾多，只係話受過教訓之後，就「日日睇財經版」去增進知識。
翻查資料，媽打多年前講過，買入滙控（005）後撞正金融海嘯，股價插水，無奈坐艇，不過佢非常樂觀，指金融海嘯對有錢人嘅損失比普通人大，可以拉近貧富懸殊，兼且「一日未賣，一日都未蝕」咁話。唔知媽打勤讀財經版7年，有乜投資心得呢？
■李明逵話退休後最好有穩健投資幫補。 
■柳俊江話自己畢業後還卡數都幾辛苦。 李明逵嘆長俸唔夠使
警務處前處長李明逵都係大使之一，佢退休後並無如許淇安、曾蔭培等加入商界，反而講到明退休後只做義工。不過佢都好老實，喺片中話「長俸都唔可以維持得好長遠」，最好有穩健、適當嘅投資幫補嚇。
前傳媒人柳俊江亦現身說法，指大學時期申請信用卡，碌卡碌得太爽，剛畢業幾年，月薪只得萬零蚊，「都幾辛苦，開大咗個頭」，仲要借錢還卡數，跌入惡性循環。
以佢呢個case，股評人陳永陸（陸叔）應該一早醒佢金石良言，陸叔嘅理財建議就係「還唔到錢，千祈唔好借錢；冇咁上下本錢，千祈唔好投資」。
短片喺投資者教育中心網站與YouTube有得睇。其他大使仲有社聯行政總裁方敏生、投資基金公會主席李錦榮等等。
李華華
mailto:LiWaWa@AppleDaily.com
李華華
LiWaWa@AppleDaily.com
中環在線 - 李華華 舊文
來源 source: http://hk.apple.nextmedia.com