智取大市：
航運股大重組之玄機
噚日中海集運（2866）、中海發展（1138）同中遠系宣佈重組後復牌，結果中海集運同中國遠洋（1919）股價插超過兩成。幕後選擇喺股市低迷之下，做一單極不受市場歡迎嘅大deal，背後係咪有玄機，反而令小弟更有興趣去留意。要消化呢單deal嘅門檻非常之
高，原因係幾單公告份份百幾頁，仲厚過本招股書，公告內容不停重覆，肯用半個鐘去睇嚇，就可留意兩項重點。
重點一，就係母公司今次將中國遠洋、中海集運同埋中海發展嘅部份乾散貨航運業務收歸國有，至於中海集運就能獲取系內金融相關業務，中海發展亦增持運油業務，如果從「中央唔會益股東」嘅簡單邏輯去思考，就係中央選擇撈底增持乾散貨航運，減持金融業務。
呢單deal完成後，中資嘅乾散貨航運股買少見少，目前仲有一隻中外運航運（368），呢隻股長期徘徊喺上市低位，不過亦喺現水平守咗好幾年，長遠會唔會跌唔落，然後嚟個大翻身，值得拭目以待。另一隻係外資持有、主營買船再租船出去嘅太平洋航運（2343），股價一直沉底，似乎冇睇頭，但假設中央眼光準確，單deal完成後一年半載行業見底，呢批股份就可能有運行，稍後小弟可能詳細研究呢個行業嘅基本因素。
重點二，中遠系曾經牽涉高管落馬嘅事件，交易令中遠向母公司減持散貨業務，中遠太平洋（1199）亦向中海集運出售集裝箱業務，結果令中國遠洋業務架構重新洗牌。至於中海集運硬食一批金融相關業務嘅不明物體，基金界必然投反對票，長沽長有，基本上中海集運有排唔使買，值得注意係中央捨棄金融相關業務，莫非中國金融最驚嚇一幕將會浮面？呢一點亦值得繼續深究。
股市波動不值得博
至於大市，噚日恒指急插過400點之後，跌幅勁收窄到百幾點，有人撈貨或揸期指同佢博反彈，亦有人候高沽，至於小弟就放棄呢類短線圖利機會，第一個理由，係市場上對手非常強，冇甜頭可言；第二，係潛在利潤不至於吸引，唔敢大注博；第三，當晉佳嘗試搵股買，只覺得個別細價股買得過，二、三線幾乎搵唔到好嘢。小弟寧願繼續棄糊，轉食花生，但轉眼間已成個月冇買賣，係2009年3月到家陣最忍手嘅時間。
近期大家睇住人民幣貶值，驚資金外逃，亦喺度估一場估估嚇嘅金融風暴出現，小弟平日喜歡分析宏觀形勢，之但係今次能見度的確低，連郭廣昌都又拉又鎖嘅話，實在唔知背後發生乜事。
成功捕捉中線升浪或嚴重超賣後嘅反彈浪，潛在利潤先至真係可觀，策略上就係利用最大嘅耐性，去等股市急插至極度超賣、出現跌無可跌嘅情況去入市，又或者用最敏感嘅觸覺，喺最短時間之下去發現下一次港股中線轉強嘅訊號。當然，兩件事情暫時都未出現，所以揀中長線買入時機，絕非現在，但係咪有排？估到嗰個就係神，所以小弟就繼續盡最大能力去等運到。
晉佳
http://www.facebook.com/pages/晉佳/719009541518415
本欄逢周二刊出
晉佳
智取大市 - 晉佳 舊文
來源 source: http://hk.apple.nextmedia.com