魚樂無窮：四個字參透大市
中港股市同吳亮星人格一樣咁衰，反而海通證券今年投資展望，值得同戰友分享。報告標題四個大字︰慢就是快——今年投資節奏要慢，買一些相對安全的資產，風起雲湧下，回報隨時會跑得快一點。
唐牛對此不能同意更多，人民幣今年行緊大跌浪，一定會影響阿爺放水力度，唔放水，A股自
然冇運行，港股更加難玩。香港亦自身難保，樓價跌跌不休，劈價一成係出貨指定動作，財富效應消失，零售業受當其衝，失業率隨時大升，惡性循環下，仲恐怖！
「經濟同股市表現唔一定掛鈎喎！」但記住，舊年風光只係因為大時代，冇嘅話，一樣死得人。前景陰霾密佈，穩守突擊好過亂衝亂撞，正如香港隊對住魚腩，可以為所欲為，但如果對手係地上最強嘅巴塞，依然有前冇後。
今日推介大快活（052），完美體現慢就是快，中期盈利升35%，毛利率持續擴闊，狠狠拋離死敵大家樂（341），股價輕鬆創逾20年新高，卻仍有4厘息墊底，難怪公司近期不停回購，目標價睇30蚊！
唐牛
https://www.facebook.com/tongcow88
本欄逢周二、四刊出
唐牛
魚樂無窮 - 唐牛 舊文
來源 source: http://hk.apple.nextmedia.com