資產股買細唔買大
2016年01月07日
港股2016三連跌，連二萬一千點都跌穿埋，新加的理由係北韓傳試爆氫彈，呢個理由其實只係借啲意，北韓搞氫彈，若然係驚爆大鑊，試問又點止跌兩百點，講到底都係市底弱，買貨的人唔敢入貨，有人沽貨就即刻質低個市。
試氫彈成為藉口
北
韓昨早進行第四次核試，聲稱首次引爆氫彈，中方已經召見北韓使館人員表達關切，南韓軍隊隨即進入緊急戒備狀態，韓美兩國軍方也啟動互助體制。事件令南韓圜走低，據外電報道，南韓央行曾入市干預，拋售美元以支持韓圜，南韓圜跌0.75%，而日圓兌美元創近三個月新高。
至於人民幣就繼續下試低位，美元兌人幣離岸價撲向6.7水平，在咁嘅局面下，恒指最多跌241點，低見20947點。午後大市仍無起色，全日挫逾兩百點，下挫207點或0.98%；國企指數收報9137點，下滑85點，成交金額752億元。
跌市下逆勢奇葩最搶鏡。新世界發展(017) 再度出擊私有化新世界中國(917) ，新中股價爆升，收造7.49元，抽升21%；新世界則瀉4%，收造7.32元。
根據建議，新世界發展提出以每股要約價7.8元現金收購所有新世界中國股份。有中環茶友事後扮諸葛亮，話早前見到新世界同新中將手上樓盤賣俾恒大套現，就覺得佢會有動作。佢先減磅再私有化，拎出袋的錢唔多，咁又何樂而不為呢？
股民愛現金多過資產
茶友講得咁口響，咁叻點解唔搵過第二隻可能私有化的股票出嚟啦？茶友話，買呢類超值股，唔可以淨係睇佢資產，仲要睇埋大股東有無動機令資產變現。好似今次買起新中的新世界，佢資產都好厚，但佢咁大隻，實唔會私有化啦，所以今次交易對佢其實有好處，但股價不升反跌，皆因大家現在對資產無甚興趣，對現金有興趣，所以最好都係買中、小型公司，尤其大股東持股多同無負債的公司，如果手頭有成幢物業就仲好，因為呢類物業價值高，而且套現較易。
茶友話，買呢類公司要極有耐性，隨時坐佢三、五、七年，所以最好係趁市況低迷時買住一注，到佢有異動時先加碼。如果以規模同折讓計，李四叔手底下的美麗華(071) 同香港小輪(050) ，都有少少呢個條件。美麗華無負債，成間公司市值不足80億元，佢喺彌敦道黃金地段兩大座物業點止值呢個錢，不過，李四叔依家仲喺個市度買吓美麗華股份，即係話佢仲未買夠，短期唔會有動作住。
新世界今次私有化新中，已經係第二度嘗試。之前一次公司仲搞埋供股集資大動作來配合，點知最後失敗。今次再度出手，外界就稍為睇高一線。花旗認為，今次私有化成功機會上升，因為現金收購的建議在時間及要約價都有更大彈性，新世界今次並沒有明確表示要約價格不會增加，亦不會增發股份。
花旗指出，今次收購價比上次不算特別好，因要約價只較新中每股淨資產約6.995元溢價11.5%，新中擁有大量成本便宜的土地儲備。經過長建、電能合併失敗之後，股東對保護價值的意識會增強，如收購低於估值或溢價不多是不會接受的。不過，新中同電能唔一樣，電能坐擁大筆現金，又有穩定收入，小股東唔賣可以收息，新中如果喺個市跌緊下有高價都唔賣，隨時就要坐多一年半載，咁都要計計機會成本划唔划算囉。
陸羽仁
金融High Tea 舊文
來源 source: http://hdfin.stheadline.com