中環在線：荷李活電影發股災財？
以金融海嘯為題 今個月上映
■《沽注一擲》喺正股滙齊冧嘅時候上映，應曬景。
新年伊始，金融市場就相當動盪，人民幣、油價齊跌，引發環球股災，A股一個星期兩次熔斷停市，令股民怨聲載道，人心虛怯，國際大鱷索羅斯仲要踩多腳，形容𠵱家市況似2008年金融海嘯，咁
啱以金融海嘯為背景嘅荷李活電影《沽注一擲》本月在港上映，認真應景！
■電影係改編自暢銷書《The Big Short》。 《沽注一擲》改編自美國小說作家Michael Lewis嘅暢銷書《The Big Short》。Michael Lewis有好幾本講金融市場陰暗面嘅書，包括《Liar"s Poker》、《Moneyball》，中環人點都應該讀過一兩本，《The Big Short》嘅故事就關於2008年金融海嘯。
其實，金融海嘯過後，隨即有幾齣相關電影上映，好似《Margin Call》（港譯《孖展風雲》），估唔到事隔多年又有一齣，咁啱得咁蹺，𠵱家環球股市跌到七個一皮，就連索羅斯都話有金融海嘯feel，可謂夾都冇咁啱。
陸叔：市況似98年風暴
提起金融海嘯，資深股評人陳永陸（陸叔）𠵱家講番都仲記憶猶新，事關佢當年買入6、7隻股份嘅股票掛鈎票據（ELN），金融海嘯殺到，佢接貨接到手軟，總共斥資過千萬元接貨。佢憶述「其中一隻係華晨（1114），接貨價1.8元，但係當時華晨做緊0.8元」好在佢持貨能力強，持貨幾年後沽出有錢賺。
經歷多次股災，陸叔都話𠵱家市況好差，佢話唔似金融海嘯，反而似1998年亞洲金融風暴，因今次風暴由人民幣下跌帶起。照咁講，散戶們唔好睇股票機，走去睇場戲算罷。
李華華
mailto:LiWaWa@AppleDaily.com
李華華
LiWaWa@AppleDaily.com
中環在線 - 李華華 舊文
來源 source: http://hk.apple.nextmedia.com