財經評論：何謂合理人情
■近日傳出的最新人情公價表，列出不同婚宴場地的「合理人情價」。 資料圖片
華人置業（127）主席、青年事務委員會主席劉鳴煒早前在港台節目《我係乜乜乜》說過一句：「求婚經費應該是零……除咗買戒指之外。」無錯，因為戲肉在後頭，擺酒、蜜月開支樣樣都係錢。
好似話金錢就是價值觀
，就是揀伴侶嘅先決條件，咁作為港女的筆者都膚淺啲，就講錢，講婚宴！的確，最近幾個月的「紅色炸彈」特別多，筆者自不然想到「人情」合理價，人家大喜日子，理應附上少少「心意」。
近年「人情」引起海量討論，有人講明「至少500元」，亦有不少文章美其名助大家「解困」，搵嚟一班婚禮統籌、酒店或酒樓負責人，以經驗推算出所謂「合理人情」，一般酒樓晚宴（普通酒樓），盛惠600元起；高級酒樓就800元；酒店晚宴就800至1,200元，看似公道地列出「最新人情公價表」。
陰謀論咁諗，分明就是一班負責定價嘅人，話畀新人知「計埋人情，你畀得起」，新人度掂條數，即可促成生意，咁就香港好，大家都好。雖然未必構成競爭法下的「合謀定價」，不過筆者就係睇唔過眼，點解人情唔可以少過500元，份心意有幾重本來就有好多考慮因素，邊個話入場門檻係500元？有個朋友講得好，如果人哋月入1萬，都拎500蚊出嚟，其實已佔其收入5%，講真，全年人工都未必加到咁多呀！
乜擺酒真係要咁貴？筆者手痕翻查婚宴專門店譽宴（1483）的年報，竟然有有趣發現。2015年上半年，婚宴客戶平均消費介乎519元至600元不等，銅鑼灣店婚宴客戶平均消費最高，錄600元，較去年底增6%（最新婚宴菜單每圍由5,980元至9,880元不等）。
每人$500夠找尾數
如果以人均消費為600元、每圍12人計，即每圍消費大約7,200元，以設宴25圍計，埋單18萬元。心水清的讀者或者知道，酒席只需落三成定，即是5.4萬元，尾數就擺完酒先畀。就當人人都畀500蚊人情，一對新人都收番15萬現金，就算無賺都夠找尾數啦！
當然，婚宴豐儉由人。計唔掂數，細搞場面一樣溫馨啫！怕失禮？（港女mode）咪儲多兩年錢囉！無謂計到咁盡，傷和氣。其實筆者幾enjoy去婚宴，去到嘅，都一定去，畢竟能夠分享一對新人臉上流露的喜悅，而且人家精心籌備，能參與其中，是我的幸運。其實，赴宴者少啲心理負擔，應該可以更享受婚宴的樂趣。
記者：黃珮琳
財經評論 舊文
來源 source: http://hk.apple.nextmedia.com