低吸蘋果?
2016/01/28 09:29:56
網誌分類: 經濟
內地股市上日大跌6%之後，仍然止唔到血，昨日繼續插，中午一度再跌3.8%，非常恐怖，午後跌幅收窄，上證綜指收市只係跌0.5%至2736點，投資者抹一把冷汗。內地股市上日跌穿去年8月的底位2850點，支持位變成阻力位，加上
市場人心惶惶，形勢認真不妙。港股昨日則跟著外圍走，恆指反彈1%，重上19000點，收報19052點，國企指數漲0.8%。
上日提過美股只係弱勢反彈，不幸而言中，杜指昨日回落222點，跌幅1.4%，完全抹去上日的升幅；標普500指數跌21點，收報1883點，跌幅1.1%；納指跌得最傷，跌100點至4468點，跌幅2.2%。
美國能源資訊署(EIA) 昨日表示，美國當周的原油庫存增加838萬桶，遠高過預期的增加410萬桶。美國原油庫存量，係經濟大蕭條以來的最高水準。紐約原油期貨回落0.5%至每桶31.93美元，能源股亦跟著回落0.6%，令大市受壓。
聯儲局昨結束一連兩日的議息會議，一如預期，決定維持利率於0.25%至0.5%不變，聯儲局在議息聲明中承認美國經濟增長放緩，淨出口依然疲軟，而庫存投資放緩；不過，家庭開支和企業固定投資近幾個月保持溫和增長勢頭，房地產領域進一步改善，據美國商務部發佈的報告顯示，美國12月新屋銷售增長10.8%至以年計的，好於市場預期，且創2014年8月以來最大增幅。2015年全年，新屋銷售增長14.6%，至50.1萬戶，更係2007年以來新高。另外，近期的一系列勞動力指標，其中包括就業強勁增長等，指向勞動力資源利用度不夠的問題進一步減輕，表示正在「密切監視」全球經濟與金融局勢發展，將評估未來的風險平衡。對此，有分析認為這是聯儲局暗示未來的加息欲望降低，係「鴿派」訊號。不過，睇市場反應，美股在聯儲局的議息聲明以及股市恐懼指標VIX指數不升反彈，似乎又唔係咁。例如Wunderlich Securities首席市場策略師霍甘(Art Hogan) 就指出，「聯儲局實際上並未關閉3月加息之門。」據芝加哥商業交易所的聯邦基金期貨最新價格顯示，市場預計聯儲局3月會議加息的概率看34.2%。睇嚟，聯儲局究竟係鴿定係鷹，投資者仲係要等到3月聯儲局開會至有分曉。
拖冧昨日大市的，除咗能源股以外，元兇係波音飛機同蘋果公司，兩隻藍籌股拉低杜指報過120點！波音飛機季度營收及盈利都好過市場預期，但公佈的全年盈利預期卻差過預期，股價全日勁插8.9%至116.58美元，係2001年10月底以來最低！而蘋果公司宣佈，因為中國經濟市場疾弱，iPhones當季的付運數量增長係2007年以來最低，營收預期營亦係13年以來首次下降。股價大插6.6%至93.42美元。
向來被稱為全球最賺錢的蘋果公司，股價在過去的6個月，已經大跌28%！CNBC人氣節目《Mad Money》的主持Jim Cramer認為，蘋果之所以跌得咁低，主要係市場分析將蘋果睇成類似HP、EMC或者Intel這些硬體公司，單單以賣出幾多iPhones去評估蘋果的表現，見到蘋果盈利預期有所下降，就認為手機市場已經飽和，Cramer認為這只是以偏概全。佢認為分析界忽視咗蘋果非常重要的一個收入「服務收入」（service revenue），包括從iTunes、音樂、app store牌照收費, iCloud及Apple Pay等等的收入，這方面的收入增長，每年達到驚人的23%，去年，就增加至312億美元。明年iPhone 7將會出籠，預計呢方面的收入將會有增無減。他認為這個數字才是關鍵，而不是蘋果賣出了多少部硬體。另外，好多硬體公司都因為全球經濟放緩，要減價促銷，惟獨蘋果的售價企得好硬，這說明蘋果有好多忠實擁躉，唔會輕易轉去其他品牌。品牌忠誠度，其實係一個好值錢的資產。
Cramer指出，但單從蘋果公司的收益流（revenue stream）考慮，這是值得持有而不是拋售的股份，目前股價93美元，已經好吸引，如果有分析員調低蘋果的評級，可能令股價再跌，更係吸納的好時機。
陸羽仁
回應(0) 我想回應
陸羽仁 BLOG 舊文
來源 source: http://blogcity.me