無牙牛抑或BB熊?
2016/01/05 09:29:12
網誌分類: 經濟
新一年美股大跌， 杜指插276點，跌因不純粹因為中國。
內地股市由今年開始，實施指數熔斷機制，撞正經濟數字唔得，人民幣又跌，結果全年第一個交易日，搞出個大黑盤，累到全世界股市跌到四腳朝天。內地股市跌停板，上證綜指勁
插243點，收報3296點，跌幅6.9%！港股恆指跌2.7%，跌浪掃到去歐洲，歐洲股市平均跌2.5%，其中德國股市跌得最慘，勁跌4.3%!
外圍咁弱，美股投資者亦腳仔軟，睇股票恐懼指標VIX指數昨日大升近14%就知道股市無運行啦。杜指繼上個交易日跌178點後，昨日再跌276點，收報17149點，跌幅1.6%；標普500指數跌31點，收報2013點，跌幅1.5%；納指跌104點至4903點，失守5000點大關，跌幅2.1%。
有紐約股市分析家指出，美股跌市固然與中國股市勁挫有關，但也有其他一籮因素所致。
先講中國。中國的「熔斷機制」（circuit breaker）係抄外國股市的一種救火工具，作用類似一個冷靜期，當股市大升或者大跌時，股市會暫時休市，等投資者可以冷靜冷靜。其實，內地股市由1996年底開始，已經引入個股漲跌停板制度，玩咁耐，內地投資者已經習慣咗個玩法，現在再加入一個類似的大市升跌停板機制，令到股市增加了兩道交易雙向閥門(-10%，-7% -5%，+5%，+7%，+10%)。按新的規定，升與跌兩個方向到達5%及7%時都會熔斷，大市升或跌至5%，都會休市15%，復市後，升跌方向上再次達到或超過5%，但尚未達到或超過7%時，則不再觸發指數熔斷，假若升或跌幅達到7%，大市將即時休市至收市；另外，若大市於14:45或以後觸發5%的熔斷，亦會休市至收市。昨日下午，滬深300大跌5%，熔斷停牌15分鐘，但複牌後暴跌至7%，大市便收市玩完。
阿爺可能係見到外國股市的「熔斷機制」對抑制股市的波動幾有效，於是引入中國，但第一日就瀨嘢，當然，到底行唔行得通，仲有待觀察，但內地證券指出，中國股市的投資者結構不合理、投資理性程度不夠，市場交易深度不足是市場易大起大落的根本原因，這些不是熔斷機制所能解決的。而老外分析家則認為，對於中國這樣動盪的股市，觸發大市「熔斷」的波幅5%似乎太細，有更改的需要。
美股大跌的第二個因素係美股2015年臨尾香，令到淡友有機可乘，繼續施壓。
第三係沙特及伊朗發生衝突，令到中東地緣政治再度緊張，投資者觀望氣份本來就濃厚；
第四係中東關係緊張，但油價卻不為所動，可見投資者預期原油供應唔會因此而下降，都係30幾美元的價位；
第五是係昨日公佈的美國12月ISM製造業指數48.2，不及預期的49，亦低過上月的48.6，再創2009年6月以來新低。在多個因素合擊之下，美股點有運行？
睇美股一年顯著回落，主要反映市場無甚買盤，雖然沽壓不太大，個市亦無動力上，尾市略彈主要是一些撈底盤。
現時市場普遍認為美股今年仍會係牛市，主要係認為美國經濟會繼續改善，而全球經濟會輕微好轉，但睇目前的情況，呢隻牛無乜牙，好友似乎有點「自圓其說」，睇唔到全球經濟有改善的跡象，美國經濟一般的好。去年年頭市場預期指數成份股有8%盈利增長，結果連續三季負增長，第四季可能都係。咁2016又點，而家市場又估指數成份股有8%盈利增長，睇落有啲搞笑。
我話真正問題係，美股究竟係無牙牛，還是BB熊，怕只怕是一個熊市開市，市勢開始向下。
陸羽仁
回應(0) 我想回應
陸羽仁 BLOG 舊文
來源 source: http://blogcity.me