L型反彈有排捱
2016年01月05日
2016年出現動盪的首個交易日，人民幣經過於假前反彈後，昨日再插，創四年新低。同一時間，A股開始實施熔斷(停市)機制，撞正經濟數據唔靚仔加人仔插水，滬深兩市插兩插就熔斷，港股跟住大幅下滑。
「熔斷機制」呢件救火工具，係抄外國股市的，估唔到第一
日實施，即刻就要用，按呢個機制，當股票交易市場(上交所和深交所)和期貨交易市場(中金所)的基準指數(滬深300指數)波動超過一定幅度時，就暫停整個市場交易一段時間，防止市場過度反應。由於昨日公佈的12月財新製造業採購經理指數(PMI)表現差過預期，A股低開低走，滬深300指數在下午1時12分急跌逾5%後，熔斷首現，暫停交易15分鐘後復市再跌過，在下午1時33分左右，跌幅擴大至超過7%，再觸及熔斷機制，股市即停市至收盤。唔排除內地淡友借新年新機制向下插食一轉。
熔斷機制 開餐藉口
A股插到熔，上證綜指收報3296點，跌242點或6.9%；深成指報11630，跌1033點或8.2%；創業板報2491點，跌222點或8.2%。內地跌到停市，港股跌過687點，低見21227點，臨近收市跌幅收斂，恒生指數收報21327點，下挫587點，跌2.7%；國企指數收報9311點，急跌349點，跌3.6%，成交738億元，現貨收市後期指插多近200點，黃昏時段夜期開市維持低水約二百點。藍籌股全軍覆沒之餘，內險、中資證券股及A股ETF捱沽，安碩A50中國(2823) 瀉6.3%；南方A50(2822) 急降5.5%。
跌市成因一籮，無論係人仔急插、A股市千億禁售股解禁、內地製造業表現差過預期，抑或停市機制燒熔股市都係病徵，亦成為淡友年頭開一開餐的藉口，但跌市底因係內地前景唔係咁好，《人民日報》喺新年伊始，又刊出一篇《權威人士談中國經濟L型增長》，強調中國唔可以靠放水改革，陣痛無可避免，可能都對個市產生驚嚇效果。去年《人民日報》訪問權威人士已令人懷疑佢哋訪問最高領導，今次又嚟權威人士專訪，自然令人牛咁眼睇實佢點講經濟前景。
權威人士在訪問中強調，中國經濟的問題主要是結構性的。當前形勢下，國民經濟不可能通過短期刺激實現V形反彈，可能會經歷一個L型增長階段。解決中長期經濟問題，用放水刺激經濟有局限性，根本之道在於結構性改革。不過，要醫得徹底，代價中國經濟短期要受衝擊，陣痛不可避免。權威人士認為陣痛是可承受的，但切不可大意。「供給側結構性改革」是不得不闖過的關，必須加快步伐推進。
內地依家潮語係「供給側結構改革」，這是甚麼意思呢？這是「十三•五」規劃提出的概念，「供給側」即是外國講的「需求方」(demand side)，阿爺過去一唔掂就放水擴大需求，如今改為要把改革的焦點轉向「供給分析」，決策出發點將從擴大需求、進行短期刺激，轉向重視要素供給方面的合理性，進行結構性改革。
唔認同一味放水做法
過去，權威人士曾經接受過《人民日報》訪問講股市經濟，被理解為係最高領導人放話。新年頭權威人士又現身，佢講明唔可以急功近利，唔可以一味放水，仲話預備咗經濟要有L型的走勢，講到L型即是長期在底部橫行，有排未得，咁A股陣痛一下又好正常喎，炒股睇短線，既然經濟要長期戰鬥，若想長線投資都要保留子彈。
不過短炒又另計，股市跌又唔會一跌到底。港股呢一浪可能穿埋21000點，向下跌至近20500點又或者差不多，反正即使睇淡上半年，仲有6個月流流長，要跌都分開嚟跌，所以插得急跌定又彈吓，但想短線博反彈，可能要等佢插多一棍。
陸羽仁
金融High Tea 舊文
來源 source: http://hdfin.stheadline.com