暫止咳 炒降準
2016年01月20日
經過上星期人行與炒家對撼，加上向人民幣海外經營行收存款準備金，人民幣匯價今個星期回復穩定。內地股市喺上證指數跌穿3000點大關的大超賣下回彈，帶動港股順勢回升，港股有可能維持上落市格局。
中央收緊離岸市場貨供應後，繼續出招為人仔護價。外電引
述消息人士說，人行部份沿海港口城市分行近日已召開會議，確定有關要求，自本周起嚴控資金池業務的淨流出上限。部份省份商業銀行跨境人民幣資金池業務，任何時點人民幣淨流出額不可以大於零。好明顯，阿爺家已經意識到，資金外流係令到內地股市不振原因，所以焦點轉到去保持匯價穩定上面。
過年前或出招
昨日內地公佈2015年中國GDP增長6.9%，正式破7，進入「6時代」。摩根士丹利華鑫證券首席經濟學家章俊預測，2016年中國經濟增速將放緩到6.5至6.6%；今年有1至2次機會降息，以回應中央降成本的要求；為應對資本外流壓力，降準次數可能較多。瑞銀證券中國宏觀經濟分析團隊認為，央行今年應會再降息兩次，時間可能都會選在上半年，第一次可能在春節前。
深滬股市急升逾3%，上證指數重返三千點大關，收報3007點，升93點；深成指數報10501點，升345點。內地股市反彈，一個講法係炒降低存款準備金率。
阿爺近日出齊各種工具放水，但年近歲晚近埋數內地資金會好緊張，所以生起減息和降準的猜測。按正常情況，若人行在過年前行動，行動前兩星期個市會炒起，然後到好消息公佈就出貨，不過目前市底較弱，借好消息炒起的幅度可能有限。
A股好轉，相關ETF同內險股都有運行，安碩A50中國(2823) 收9.33元，升3.6%；南方A50(2822) 仲勁，漲3.9%，報11.22元。內險股表現更靚仔，中國平安(2318) 勁飆5.33%，收報36.55元。三、四股仔反彈幅度自然更大。
受A股急升刺激，港股強勁反彈，恒指收報19635點，勁彈398點；國企指數收報8377點，飆升242點，成交金額830億元。
雖然恒指彈得咁急，相信主要係超賣同補倉。過去呢類受貨幣政策影響的跌市，會拖一段時間先真正見底。如果阿爺繼續做嘢，唔排除個市仲會再彈高啲，但急彈後追貨，走短線唔係咁易有甜頭。
個市跌到變形，好多大股都較便宜，有人話匯控(005) 不貴，有人話中移動(941) 抵買，真係有賤物鬥窮人之歎。講起中移動，德銀估計它在4G市場的領導地位持續，今年派息比率或升至50％。評級上調至「買入」，維持目標價105元。中移動亦獲美銀美林評為行業精選。
近日睇中移動跌到79元好似唔想再跌，見咗個雙底，昨日升3.4%收82.8元，在呢啲亂市，中移動現金收入多，都算係較穩陣股份。
伯南克話美元未轉勢
亞洲貨幣受美國加息同強美元影響，雞犬不寧，美國聯儲局前主席伯南克在港出席論壇時，佢講話好多人都有興趣聽吓。佢預期，今年全年美股走勢會較現時好，波幅就不會太大。對於美元走勢，伯南克認為未來每次加息，美元都會進一步升值，但同時覺得美元已過強，市場對美元有過份升值預期，將造成風險。照佢分析，包括香港在內的新興市場，強美元的苦頭仲未捱完。
講到人民幣，伯南克指，人民幣市場由人行和市場力量角力，人民幣匯率走勢，將取決於人行如何應對市場力量。初步有個感覺係美國對於人民幣的波動唔算太過擔心，咁即係聯儲局因應亞洲呢輪震盪調整貨幣政策的機會暫時唔高，3月仲有加息機會。
陸羽仁
金融High Tea 舊文
來源 source: http://hdfin.stheadline.com