攞命式供股
2016年01月27日
周初全球股市反彈，但跟住出現不良徵兆，油價又散散哋，向下急插。跟住果然美股杜指上日又隊番208點，港股跟住低開，好快跌咗三百幾點，下午內地股市急插，港股進一步滑落，收市略彈，都唔見咗479點。
大摩估恒指或見16500
內地彈後再跌，有小小
無名腫毒感覺，滬深兩市大幅低開，午後跌勢轉急，滬指插逾6%，一舉跌破2015年8月股災2851點低位，創十三個月收市新低；深成指跌近7%，一萬點大關不保。上證指數收報2749點，大跌188點或6.4%；深成指數收報9483點，瀉708點或7%。阿爺為保匯價暫時唔降準，等如係唔郁手力托經濟，喺阿爺唔托或想托都無計下，股市抽晒筋，企唔定借啲意又大幅插低。
同A股急插6%比較，港股已算跌唔得多。恒指收報18860點，跌近2.5%；國指收報7897點，跌275點，幅度3.4%。A股影響下，安碩A50中國(2823) 勁挫5.7%。外資大行摩根士丹利認為，港元拆息喺聯匯下被扯高，通常都會推低股市，估計今年恒指有機會跌至16500點，仲調低咗地產股目標價17%。
個市本質弱，內地終於穿咗去年低位，早已穿底的港股，又睇係會否再穿上周低位啦。
喺浪比浪低的跌市中，仲有大股東提出攞命式供股。錦興集團(275) 股份昨日大幅下插，收市報3.8仙，急挫58％，皆因公司宣佈又合又供，新股折讓大之餘集資比例超高，令小股東供又死、唔供又死。
錦興宣佈動用22億元購入廣州物業，同時宣佈每10股合併為1股，之後按每一股合併股份供8股，供股價0.25元，涉發行44.95億股供股股份，以籌集約11.237億元。所得款項之淨額約為11億元，將用於收購物業。
在未宣佈業績前，錦興股價約為8仙，10合1後等如8角，根據建議持有8角股份要供2元股份，正式妹仔大過主人婆，咁重負擔，小股東一聽自然手軟腳軟，走都走唔切啦。
睇番過去錦興派息時有時無，供股就不時發生，09年公司曾1供3，兩年後再來1供8，去年1供6，當時供股價16仙。經過去年第三季開始的跌浪，股價跌破供股價再插低，到呢個星期差不多跌咗一半，公司喺呢個時候再供股，小股東係咪暈得一陣陣先？
弱肉強食 細股難博
睇番錦興表面真係大超值，未跌之前市值唔夠5億，形同殼股，跌完之後得番唔夠2億元，但佢每股資產淨值有成1.16元，市價只係資產值零頭。喺咁狀況下，管理層係咪應該為了買物業大量發行股票呢？相信好多小股東都有保留。
可惜，公司唔係由小股東話事，供股計劃大股東一樣有權投票，所以小股東只有兩個選擇，一係照跟，一係棄權任人攤薄，喺現金是王的動盪市況中，大股東出呢招，對莫財小股東認真攞命，就算係有銀小股東，見佢咁玩法，都真係進退維谷，被人玩殘。只係可以講，股市係英雄地，弱肉強食，呢間公司低價供股唔係第一次，落得疊者應該預咗先好上擂台。
喺家呢的市況，上市公司大股東各師各法。過去好多公司都係向下炒，炒到你無力跟，佢集哂先來一招絕地反攻，大幅炒上兼有時仲會派高息。不過，大股東向下炒好似睇通骰盅同你玩大細，佢可以數晒飛先開車，一日未齊飛佢都仲可以唔郁，所以買三、四線股係高風險的高難度動作，若然普通股民只係想買股增值，都係搵番啲可以收息兼搏走埋上落的大股穩陣好多。
陸羽仁
金融High Tea 舊文
來源 source: http://hdfin.stheadline.com