一周三件：神數分長短打
■神州數碼最近兩個月喺7.7蚊到9蚊上上落落；圖為集團主席郭為。 資料圖片
神州數碼（861）上年出售分銷業，講明每股計劃派3.2元特別股息，睇位落注，長短打，等食呢口豐厚甜品。
神數分銷業買家深信泰豐（深：000034），作價為40億元人仔。後邊深信泰豐透過
配股集資22億元人仔，餘額另自籌資金。呢壇製作，除咗已經獲得中證監發批文，批准深信泰豐配股，最新消息係，收購家陣獲得商務部審批，而就現金款項一part，深信泰豐亦同緊意向銀行磋商。
博有甜品派送
又由中證監上年12月中核准配股有效期半年計，已經過咗兩個月；而深信泰豐配股承配人當中，亦包括神數掌舵同股東郭為，郭生承配分部，講緊11.5億元人仔。成個picture睇，呢壇出售到科水，如無意外，已經到埋門一腳。
神數亦預計，呢次出售分銷業，可以獲一次性收益8.6億元。集團就快派2015年成績單，博甜品派送，同潛在盈喜，係chance面。
神數最近兩個月，一路喺7.7蚊到9蚊上上落落，但睇港交所（388）中央結算紀錄，到本周三（17號），北水透過港股通最新揸神數約9,634萬股，佔約8.8%權益。呢個持股量，仲係keep喺高位，北水一樣等緊財息兼收。
吼住7.7元落注，長短打，一注短線，喺上邊橫行區炒上落，一注揸長少少，博特別股息派送。又連潛在除息計，神數理論價5.26元，呢板中線，博上番近5年平均1.5倍PB計數，除息理論價要升37%，到7.2元。呢個PB，啱啱好先追到場內PB最近磅嘅中軟國際（354）。
錢雋
細價股專家
本欄逢周一、三、五刊出
錢雋
一周三件 - 錢雋 舊文
來源 source: http://hk.apple.nextmedia.com