中環在線：北上去精電廠房要3粒鐘
高振順賣盤怕乖女辛苦？
■高振順一向好錫寶貝女高穎欣（右）。 《壹週刊》圖片
雖然蔡東豪已經離開精電（710）一年有多，但係一提起精電，大家始終想起佢。新近精電易主，「低調殼王」高振順將呢隻股賣畀內地京東方，大家立即想到，可能係高振順錫住寶貝女高穎欣
，唔想佢好似蔡東豪以前成日北上睇廠咁辛苦。
精電主要生產汽車顯示屏，喺廣東河源設廠，蔡東豪以前講過，每個星期都要坐3粒鐘車去河源睇廠，仲要過一晚夜，不過佢2014年底忽然辭任行政總裁，改由高穎欣頂上。
收特別股息7,378萬
或者高穎欣都頂唔住做廠嘅辛苦，又或者佢本來就唔多鍾意做廠，精電最終都係賣盤。
精電計劃向內地專門做顯示屏嘅廠商京東方，以每股3.5元發行4億新股，涉及資金14億元，完成後，京東方持有精電約54%股權，成為大股東。至於持有5,465萬股精電嘅高振順，持股量將會被攤薄至7%左右。
呢單刁特別之處，係精電會喺交易完成後派特別股息，每股1.35元，高振順隨即有錢落袋，約有7,378萬元可以袋袋平安，猴年發大財，都幾和味。
查實，高振順賣精電嘅手法，同高振順過去喺瑞東（376）與光啟（439）等嘅賣殼手法相若，都唔係自己賣舊股，而係以低價向「優質投資者」，好似馬雲有份嘅雲峰基金、劉若鵬等配發大量新股，攤薄自己股權，總之多數仲會揸住隻股。今次賣完精電派特別息，就比較特別。
李華華
mailto:LiWaWa@AppleDaily.com
李華華
LiWaWa@AppleDaily.com
中環在線 - 李華華 舊文
來源 source: http://hk.apple.nextmedia.com