戰雲罩新春
2016年02月05日
港股今天係羊年最後一個交易日，本來年尾歲晚收爐，好多人仲提早攞假外遊。但今年大市氣氛緊張，外資會唔會趁農曆年阿爺放長假期間施襲，成為猴年第一個問號。
羊年可以話係阿爺鬥外資嘅一年，基本上外資繼續唱空中國，但A股喺第二季夾上，令外資氣
燄收斂。到第三季內地股市暴挫，阿爺擺明唔妥造淡份子，拉人封艇之餘，外資都轉趨低高。不過，自從人民幣入籃後，空倉大鱷開始活躍，最近仲輪流出擊，加強出口術。
大鱷玩猜外儲數字遊戲
外資看淡主軸係人民幣有貶值壓力，《巴隆氏》作者Shull Ren就以做《猜猜一月份大陸外儲有多少》為題，話人行安排咗喺二月七日星期日會公佈外儲數字。分析員估計外儲跌幅將會破紀錄，大行估計約為一千三百至一千四百億美元之間。之前，市場曾經謠傳跌幅會高達二千億美元，數字非常誇張，但相信呢個估計都會幾錯。
由於人行預計發佈外匯儲備數目的時間，已經係香港放長假的日子，跟住內地就會放春節假，得番香港下星期開市。過往呢啲日子買賣兩閒，市況主要跟住美國走，今年情況有少少唔同。內地股市最近下插，香港成為提款機，但內地股市插低後有國家隊護盤，春節期間內地股市唔開，人民幣內地在岸市場即將「收爐」，至農曆年初九才復市，期間不會有中間價作引導，不排除離岸價將會十分波動，淡友會唔會借機進攻就好難估嘞。
國際大鱷幾時進襲令人神經有啲緊張，而且佢哋亦表現出急不及待的狼兇姿勢。早前揚言用了幾十億美元沽空人民幣的美國對沖基金海曼資本管理(Hayman Capital)創辦人Kyle Bass就走去接受CNBC訪問時，質疑中國銀行體系過份膨脹，為人民幣匯率大幅下滑原因，而臨近農曆新年，市場造淡人民幣活動有轉趨活躍跡象。
Kyle Bass解釋其理據，指出現時內地銀行體系規模相等於國內生產總值(GDP)3倍，隨着經濟轉弱，將會湧現龐大的壞帳，最終需要靠中央動用外匯儲備救市。
大鱷表現得咁勇，你可以話佢睇落信心十足，但亦有可能佢係虛張聲勢，希望觸動市場的羊群心理，令預言自我實現。對沽空大鱷嚟講，睇啱方向固然關鍵，但時間同樣好重要，因為佢哋通常借大幾十倍，要支付融資利息，若然佢賭嘅方向唔係預計時間內實施，咁佢哋就輸利息都輸死。家睇嚟阿爺唔想畀淡友贏錢，不惜夾息托價，希望可以逼班空軍平倉，大戶於是就出嚟猛唱，希望動搖公眾信心，企埋喺睇淡行列。由於農曆年係交投淡靜日子，呢個時間郁個市，子彈少效果大，過去每隔幾年美元就會係長假夾倉，睇吓今年會唔會輪到喺人民幣身上發生。
基金呼籲東亞賣盤
隔晚美股急升，內地股市亦造好，上證指數收漲41點；深成指報9793點，升154點，帶動恒生指數一度升逾300點，收市反彈191點，報19183；國企指數收報7974，漲116點；成交654億元。
美國加息預期降溫，刺激本地地產股上升，恒基地產(012) 升1.26%，報40.05元；新鴻基地產(016) 升1.6%，報82.15元。
基金股東Elliott Management公開信敦促東亞(023) 賣盤，指東亞放售的每股價值達60元，為今日收市價的3倍，令東亞股價急升，收報21.8元，升4%，為第三大升幅藍籌，可見基金大戶出口術，無論大市同個股都唔放過。
陸羽仁
金融High Tea 舊文
來源 source: http://hdfin.stheadline.com