亞幣腳軟 暗藏殺機
2016年02月18日
股匯市場唞咗一輪，昨日又開始異動，較顯眼係韓圜低處未見低，跌至逾5年低位。美元兌韓圜最高見1228圜。同一時間，本港離岸人民幣隔夜拆息，錄得一個月以來最大單日升幅，息升即係水緊，令人關注亞洲匯市會否再掀風浪。
財資巿場公會公佈本港人民幣
同業拆息定盤價，隔夜拆息由前日大約1.87厘，大幅抽升1.529厘，升穿3.4厘，以升幅計，為上月12日以來最大。一星期拆息變動不大，微升至約5厘水平，人仔匯價似乎暫時在中央力控下仍能維持穩定。而南韓企劃財政部警告，若有必要會穩定外匯市場，當局將採取堅決的維穩行動，睇嚟匯市暗藏殺機。
反彈力疲 中港背馳
昨日提到港股有點要回氣的味道，結果大市走勢果真如此。即使上日美股杜指大升222點，港股開市抽唔夠一個鐘就回頭，最高升過186點，跟住一級級落，即使內地股市相反地級級上，最後上證綜指收升1.1%，港股都要插，恒指收報18924點，跌197點；國指收報7928點，下滑99點，成交金額670億元。
睇個股匯控(005) 彈完兩日再跌，重失50元關，全日跌1.7%，造49.5元。油股係重災區，全球兩大石油國俄羅斯及沙特阿拉伯，昨日閉門會議後僅同意凍結產量，令市場預期減產的希望落空，石油股遭拋售。中海油(883) 急降4%，造7.79元；中石化(386) 挫3.6%，造4.26元；中石油(857) 算最叻，都跌3%，造4.82元；昆侖(135) 挫4%，報5.68元；油服股中海油田服務(2883) 插5.3%，收5.33元，為表現最差國企指數成份股。
中環茶友話，呢兩日內地個市有少少超常地強，可能同見到1月大筆放貸2.5萬億有關，見到水鬆大家願意去炒嘢。但亞幣的形勢咁劣，大家都當反彈市炒完就走，皆令港股難以維持升勢，通常反彈市有一個時間過程，目前正在消耗這個過程，又未睇到令大市大幅向上的推力。
日圓彈升吸引大量空倉
亞洲匯市暗湧再起，最大原因係日本央行早前實施負利率政策，竟然觸發避險情緒急增，吸引避資金流入，日圓不跌反升。韓圜受壓，係咪代表人仔又會湧現壓力呢？有財金猛人話，內地官員已經明言，人民幣不存在持續貶值空間。睇人民幣匯價唔同港元，因為港元係同美元掛鈎，人民幣係同美元加歐羅、日圓掛鈎，如果用一籃子貨幣睇，人民幣係有升有跌，所以唔可以只睇兌美元跌，就話人民幣有大貶值壓力。
猛人話，中央講明係唔想投機資金主導市場情緒，為了力保人仔匯價穩定，不惜喺離岸市場托價夾息，令到離岸價一度高過在岸價。咁做無疑係犧牲咗人民幣離岸市場的發展，但亦證明炒家唔係咁容易喺沽空人仔身上獲利。
雖然中央力托股匯市場，但睇淡大鱷仲係覺得形勢有利，可以估計未來好淡雙方仲會繼續惡鬥。外資現時睇淡一個主要論據，係內地銀行業經營狀況不斷惡化。高盛就發表報告，估計內地銀行業壞帳率實際上高達9%，評級機構標準普爾亦對中國債務水平感憂慮。
高盛報告話，內地企業盈利持續疲弱，當中以上游行業問題最嚴重，經初步研究後，利息及稅前利潤對比企業需要支付的利息，估計去年內地銀行不良貸款比率達9%，官方公佈的數據則只有1.7%。該行估計，內地商業銀行需時五至六年消化潛在壞帳損失，預期當局今年有機會放寬不良貸款撥備覆蓋率。
高盛呢種都係外資主流意見，雖然我哋可以話美國的銀行成身次按炸彈都未拆晒，但今天佢哋怕中國的銀行多啲，你都無符。預計內銀走勢短期內會繼續維持弱勢。
陸羽仁
金融High Tea 舊文
來源 source: http://hdfin.stheadline.com