智取大市：殭屍企業拖累好股
■非H股藍籌如中移動都面對阻力。 資料圖片
自從今年初，H股指數跌穿咗9,000點呢個歐債危機後連番守得住嘅重要支持位後，呢個位置肯定變成非常大嘅蟹貨密集阻力位。至少唔會第一次反彈至接近阻力位，而缺乏踴躍成交之下，就能輕易突破。
不約而同地，其他非H股藍籌
，例如長和（001）、中移動（941）都面對同等阻力。以H指月線圖觀察，近期反彈似後抽多於升浪，長線技術趨勢，絕對要尊重。換言之，持有基本因素無甚特別嘅指數相關股份，真係無勝算可言。
H指長線技術走勢差到無人有，某程度上反映大陸實況，因為太多殭屍企業存在，最搞笑係呢批殭屍企業竟然係港股市值最高嘅股份，主宰整個H指。而H指嘅圖表，正正係反映市場對於H指成份股未衰完、甚至冇希望嘅睇法。
無論中資股定係樓市，近期都出現兩極化嘅情況。極強股方面，舜宇光學（2382）沾上VR概念固然無敵，至於其餘業績靚仔、噚日爆上股份，例如信義玻璃（868）同特步（1368），牌面的確唔差，長線持有的話，要考慮殭屍企業同殭屍經濟會對佢哋構成打擊多啲？定係呢批有競爭力嘅公司能夠掉番轉幫到經濟？小弟暫時比較相信係前者，好股始終有機會畀個大浪拖累，所以，長線好股𠵱家買定唔買，要先視乎股份受經濟影響程度有幾深，可能等嚇，仲有更好機會。
晉佳
https://www.facebook.com/advanceguy1/
晉佳
智取大市 - 晉佳 舊文
來源 source: http://hk.apple.nextmedia.com