儲局放鴿
2016年03月18日
美國聯儲局舉行會議決定唔加息，同時透露今年可能加息兩次。由於之前市場委員會預期加息係四次，外界解讀加息壓力減低。包括港股在內的亞洲股市跟隨高開，但之後升幅收窄，證明大家都對聯儲局的取向有預期，故此熱情好快冷卻。
聯儲局在議息聲明預計，今年只會加息
兩次，年底利率估計大約1厘，至於2017年也只會加息兩次。同一時間，局方下調今年對美國經濟增長的預期，由此前的2.4%降至2.2%，反映唔太睇好未來的經濟增長前景。
金管局籲小心美通脹
在聯儲局開會前，陸羽仁已經估耶倫做鴿機會較大，除咗經濟因素，仲因為今年係選舉年，通常選舉年好少加息，今年例外主要係因為美國處於超低利率太耐。雖然係咁，如果聯儲局主席不斷加息，咁就有同執政黨倒米之嫌。
美息不變兼利率前景轉軟，家聯儲局話加兩次，大家又會估會唔會遲啲變成唔加先？對於呢個問題，香港金管局總裁陳德霖就跳出來搶答，提醒大家仍要小心利率上升帶來的風險。
陳總喺覆傳媒的電郵指出，雖然聯儲局委員會成員預期加息次數減少，但佢留意到近期的數據顯示，美國勞動力市場持續有改善，核心通脹率正在上升，認為美國未來加息步伐仍然存在頗大的不確性。解讀陳總的說話，就係美國增長雖然弱咗，但通脹升緊。如果通脹係咁上，美國都會焗住加息。
講到通脹，聯儲局聲明都有提到目前預期美國今年的總體通脹率(headline inflation)，即包括比較波動的食物及能源價格為1.2%，較去年12月時的估計1.6%為低，不包括食物和能源的核心通脹則由1.9%下調至1.8%。如果只係睇呢個數字，就顯示物價升溫唔係咁勁。有個說法係陳總所擔心的唔係食物及能源，而係美國失業率已跌至5%以下，以成熟經濟嚟講已經好低，如果再跌接近自然失業率，即係因為轉工或其他理由造成的失業，咁工資就會上得比較快，屆時息口就可能會掉頭向上。
無論點講，陳總肯定都係個瞻前顧後的穩陣派，未加息已經響定警號。短期而言，由於美息無向上，喺香港的大量資金外流亦都好緩慢，故此仲未見到本地需要追番上次美國加息。匯控喺會後發聲明，表明最優惠利率會維持於5厘，恒生(011) 和中銀香港(2388) 都保持最優惠利率不變。市場資金水浸，仲有唔少銀行降樓按利息搶客。
美國聯儲局向市場「放鴿」，恒指高開323點，早段升幅一度擴至362點，跟住內地上證指數曾掉頭下跌，令港股升幅收窄，尾市再有買盤湧入，最終升近250點，但企在20500點上收市。恒指收報20503點，升246點；國指收報8773點，上揚202點，成交金額707億元。
新世界炒私有化新中
呢排工業股有炒風，手機零件股績佳，多隻落鑊熱炒，通達(698) 去年盈利升四成，股價急揚14%，報1.49元；早兩日提過的舜宇(2382) 股價再創新高，高見22.95元，收造22.55元，大升10%。
新世界(017) 收購新世界中國的建議，喺下星期(21日)就會屆滿，公司近日賣晒報紙叫股東接受。公司強調上次已經有超過99%股權接納，但係「數人頭」的另一要求下失敗，今次捲土重來除咗加價，仲改咗用私有化的方式，唔使再數人頭。似乎市場對今次私有化甚有信心，呢排新世界見有買盤，股價由農曆年低位5.87元彈上7.59元，比低位升近三成，唔排除會跟住消息再炒作。
陸羽仁
金融High Tea 舊文
來源 source: http://hdfin.stheadline.com