智取大市：股票贏家條件（一）
■唔少人能夠撞到一個牛市身家翻一番，但好快打回原形，甚至倒輸。 資料圖片
小弟見識淺薄，識過絕大部份股市贏家，都係喺約30歲或以下，就能掌握賺錢方程式，幾年內賺到改變生活嘅財富。相反，炒股多年，去到40歲關口仍輸多贏少，之後能變身成為贏家嘅人，有都係好少
數，而唔少人能夠撞到一個牛市三期，身家翻一番，但好快打回原形，甚至倒輸。
小弟非廣交結友之輩，識朋友唔多，上述經驗絕對取樣不足，但可以當成一種現象去睇。點解30歲？一個後生仔投身社會，先儲幾年錢才能炒股，當25歲落場博殺，有驚青過、有盲目奮勇過，跟住找到適合自己嘅方法同節奏，幾年時間剛剛好。
炒股十年八年，年紀去到四張，都未找到贏錢方程式，就要反思兩個問題，第一，可能閣下對股票興趣不足，懶得尋找改善炒股嘅方法，才會一直輸錢；第二，可能閣下個性不適宜炒股。方法係最重要，有方法，就知自己咩情況會贏。
NBA咖喱仔都唔係每場波都射得準，贏錢方程式，某程度上係捕捉自己咩時間會準。即使一年內只有兩個月準，就利用嗰兩個月炒得有咁盡得咁盡，就等如全場波48分鐘內，咖喱仔把握最準嘅3分鐘，就入5個3分波，呢15分，就夠隊波贏全場賽事。
贏錢最基本技巧，係搵出一段自己能贏嘅時段或狀況，然後把握呢個時段不斷進攻。
晉佳
https://www.facebook.com/advanceguy1/
晉佳
智取大市 - 晉佳 舊文
來源 source: http://hk.apple.nextmedia.com