智取大市：業績尾聲炒到識飛
■港股短線資金搶績優股。
聯儲局耶倫「發盈喜」，港股隨即爆上，一支陽燭足以補番曬過去5個交易日嘅陰燭，短線動力唔弱，加上業績期尾聲，淨係計3月31日公佈業績都有129隻股，當中梗有靚業績，短線資金搶績優股足以助長尋寶氣氛，所以，不妨進攻埋呢兩日業績尾段蜜月
期先算，去到星期五收市前先考慮收隊。業績咁多，你根本買唔曬咁多隻，何不貴精不貴多？今期流行炒業績方式，係搵去年盈利有增長、而股價低殘未點炒過嘅股票，開市有買盤掃入就照跟可也。
大唐發電（991）29號晚公佈舊年純利按年升57.7%，至27.88億元人民幣，翌日即刻升一大棍，就係因為炒業績。炒咗一日後，星期四朝早先追大唐發電唔劃算，最好當然係喺新鮮出爐嘅業績裏面再揀過，去到截稿前未有好選擇，希望搵到機會。
短線炒股只係順勢而行，中長線buy and hold就要講究更嚴格嘅條件，可惜中長線條件遠未達成，所以小弟仍未改變睇淡方向。
之前講過，H指升到接近9000點呢個歐債危機至今形成嘅密集區域，以目前交投實在唔容易突破呢個阻力位，橫睇豎睇目前絕非buy and hold嘅時候，除非揸住舜宇光學（2382）呢類長線強勢股就另作別論，呢類股仲有繼續hold嘅本錢。
晉佳
https://www.facebook.com/advanceguy1/
晉佳
智取大市 - 晉佳 舊文
來源 source: http://hk.apple.nextmedia.com